Ana öz körpəsini 3 il şkafda gizlətdi

İngiltərədə körpəsini üç ilə yaxın çarpayısının altındakı şkafda gizlədən ana 7,5 il müddətinə azadlıqdan məhrum edilib.

Sonxeber.az türk mediasına istinadən xəbər verir ki, ana körpəsini öz qardaşlarından və tez-tez evində qalan sevgilisindən gizlədib.

Uşağın təhlükəsizliyini qorumaq üçün ananın adı açıqlanmayıb.

Ananın sevgilisi körpəni təsadüfən tapıb. O, tualetə gedəndə səs eşidib, otaqlardan birinə baxıb və körpəni görüb.

O dərhal vəziyyəti polisə bildirib. Hadisə yerinə gələn polislər ananı həbs edib.

Üç yaşına az qalan vaxtda evdən tapılan körpənin saçları keçəlləşib, bədənində deformasiyalar və səpgilər yaranıb. Balaca qızcığaz tapılana qədər heç vaxt gün işığı görməyib.

Sosial işçi məhkəməyə bunları deyib: "Polislə evə getdiyimiz gün ana çox normal şəkildə körpəni şkafda saxladığını söylədi. Onun heç bir emosionallıq göstərməməsi və vəziyyətə əhəmiyyət verməməsi məni şoka saldı. Elədiyi şey çox normaldır kimi davranırdı", - deyə bildirib.

Məhkəmə qadını 7.5 il müddətinə azadlıqdan məhrum edib.

Telegramda izləyin