"Avropa İttifaqı gürcülərin ləyaqətinə hörmət etdiyini sübut etməlidir" - Bəhruz Quliyev

"Qərbin Gürcüstanda dövlət çevrilişinə cəhd edəcəyi və bunun üçün hazırlıqlara başladığı əvvəlcədən bəlli idi. Hələ parlament seçkilərindən əvvəl bu iddia ilə çıxış edən Avropa İttifaqı Gürcüstandakı emissarları vasitəsilə ölkədə çaxnaşmalara hazırlaşırdı. İndiki qarşıdurmaların ssenarisi xeyli əvvəl yazılıb, bu gün artıq onun həyata keçirilməsi prosesi gedir. Qərb Gürcüstanı Rusiyaya yönəlik siyasət yürütdüyünü, daha dəqiq desək Rusiyanın çətiri altına girdiyini, Avrointeqrasiya prosesini dayandırdığını iddia edir. Halbuki, hər şey Avropa İttibfaqının Gürcüstanı üzvlüyə namizədlər siyahısından çıxardığı gündən başlayıb".

Bunu açıqlamasında SƏS Media Qrupun rəhbəri, siyasi analitik Bəhruz Quliyev deyib.

B.Quliyev son hadisələri xatırladaraq qeyd edib ki, Avropa Parlamenti Gürcüstan hakimiyyətinə qarşı növbəti qətnamə qəbul etməklə bu ölkəni özündən bir az da uzaqlaşdırıb: "Avropa Parlamenti digər məsələlərlə yanaşı vizasız rejimi ləğv etməyi, hakim elitanın üzvlərinə qarşı sanksiyaların tətbiqini təklif edib. Avropa Parlamentinin üzvləri tamamilə Gürcüstan prezidenti Salome Zurabişvilinin və "Gürcü arzusu"nun digər əleyhdarlarının bəyanatlarına əsaslanan qətnamə hazırlayıblar. Nəticədə müxalifətin hakimiyyətə olan bütün iddiaları qısaca təkrarlanıb. Digər tərəfdən də Avropalı deputatlar Brüsselin Tbilisiyə ayırdığı maliyyə yardımını da unutmayıblar. Onlar Gürcüstan hakimiyyəti üçün nəzərdə tutulan əvvəllər dondurulmuş 120 milyon avronun yerli qeyri-hökumət təşkilatlarına, o cümlədən mediaya köçürülməsini təklif ediblər. Bu yolla Avropa Parlamentinin üzvləri Gürcüstan vətəndaş cəmiyyətinin inkişafına kömək edəcəklərinə ümid edirlər".

Bəhruz Quliyev vurğulayıb ki, Gürcüstan parlamenti hökumətin tərkibini təsdiq edəndən sonra baş nazir Kobaxidze çıxış edərək ölkəsinin bundan sonra da Avropa İttifaqına inteqrasiya etmək yolunu tutacağını qeyd edib

"Əlavə edib ki, Gürcüstan milli maraqlarına zidd olmayan bütün şərtləri qəbul etməyə hazırdır. Avropa İttifaqı da gürcülərin ləyaqətinə hörmət etdiyini sübut etməlidir. Əlbəttə Avropa Parlamentinin qətnaməsi "Gürcü arzusu"nu və Aİ-ni geri dönüşü olmayan nöqtəyə yaxınlaşdırıb. Rəsmi Tbilisinin reaksiyasının necə olacağını gözləmək lazımdır. Bunun sırf neqativ olacağı aydındır, lakin məmurların yalnız ədəbi ifadələrlə dayanacaqları, yoxsa hansısa siyasi və hüquqi nəticələrinin olub-olmayacağı məlum deyil. Bununla yanaşı, "Gürcü arzusu" sanksiyalar təhlükəsinə hazırdır, ona görə də bu, çətin ki, onun üzvləri üçün hər hansı stress yaratsın".

Telegramda izləyin