Ad günündə hədiyyə edilən loto bileti sayəsində milyonçu oldu

Avstraliyanın cənubundakı Moonta şəhərində yaşayan qadın heç gözləmədiyi şəkildə milyonçu olub.

Sonxeber.az xarici mediaya istinadən xəbər verir ki, qadının qayınanası və qayınatasının aldığı hədiyyə loto bileti ona 2,3 milyon avro qazandırıb.

Belə ki, gəlinin ad günü üçün nə hədiyyə alacaqlarını bilməyən ailə böyükləri ona loto bileti alıblar.

Bileti birbaşa gəlinə vermək əvəzinə evinin poçt qutusuna qoyan cütlük uduşlu nömrə aldıqlarından xəbərsiz olublar.

Qadın ad gününü qeyd etmək üçün bütün günü fərqli yerlərdə olub. Evə qayıtdıqdan bir neçə gün sonra hədiyyələrini açmağa qərar verib və bu zaman loto biletinin üç gündür poçt qutusunda gözlədiyini görüb.

Əvvəlcə o, cəmi 20 avro qazandığını düşünsə də, əsl cekpot düz 2,3 milyon avro idi. Uduşlu bilet onun üçün unudulmaz ad günü hədiyyəsi olub. Adının açıqlanmasını istəməyən qadın "Belə böyük bir mükafat qazandığıma inana bilmədim. Bu, hələ də çox real deyil. Bu, aldığım ən böyük hədiyyədir" deyərək hisslərini bölüşüb.

Moontadan olan qadın mükafatını necə xərcləyəcəyi ilə bağlı heç bir məlumat paylaşmayıb.

Telegramda izləyin