Videoya görə iki ayağını sındırdı - VİDEO

İstanbulda yaşayan və ekstremal idman videoları çəkən İbrahim Koyuncu (25) yerüstü keçidin altından keçərkən 6-7 metr hündürlükdən yola düşüb və hər iki ayağını sındırıb.

Sonxeber.az türk mediyasına istinadən xəbər verir ki, hadisə Kadıköy rayonunun Ayrılık Çeşmesi ərazisindəki piyada keçidində baş verib. Bir müddətdir ekstremal idman növləri ilə maraqlanan İbrahim Koyuncu sosial media hesablarında çəkdiyi adrenalin dolu videoları paylaşmağa başlayıb.

Göydələnlər arasında və ya binaların boşluqlarında yüzlərlə metr hündürlükdə videolar çəkən İbrahim Koyuncu, nəhayət, dəmir barmaqlıqlardan yapışaraq piyada keçidini keçmək qərarına gəlib. Həmin anları Koyuncunun dostları onu cib telefonları ilə çəkməyə başlayıblar.

Bir müddət sonra estakadadakı vintlər üzündən davam edə bilməyəcəyini anlayan İbrahim Koyuncu boşluqda asılı qalıb. Geri qayıtmağa çalışan Koyuncunun gücü tükənib və özünü maşınların keçdiyi yola atıb.

İbrahim Koyuncu yolda avtomobilin üzərinə düşməkdən çətinliklə xilas olub. Koyuncunun dostları yolun kənarına çıxaraq vəziyyəti 112 Təcili Zəng Mərkəzinə bildiriblər. Xəbər verildikdən sonra hadisə yerinə həkim briqadası göndərilib. İbrahim Koyuncu təcili yardımla xəstəxanaya aparılıb.

Müayinə zamanı hər iki ayağında sınıq olan Koyuncu əməliyyata alınıb.

Telegramda izləyin