Yuxuya tez getmək üçün qaydalar - Nevroloqdan məsləhətlər

Möhkəm və sağlam yuxu yaxşı əhvali-ruhiyyə və yüksək məhsuldarlığın əsas şərtlərindən biridir. Lakin müasir həyat tərzi, stres və elektron cihazların (qadjetlərin) daimi istifadəsi yuxuya getməkdə çətinliklərə və yuxu keyfiyyətinin pozulmasına səbəb ola bilər.

Oxu.Az-ın iz.ru portalına istinadla verdiyi məlumata görə, rusiyalı nevroloq Yekaterina Demyanovskaya keyfiyyətli yuxu üçün vacib məsləhətlər verib.

Onun sözlərinə görə, sağlam və dərin yuxu üçün düzgün hazırlıq olduqca vacibdir.

"Rahat mühit yaradın"

"Yaxşı yuxu üçün ilk növbədə rahat bir mühit yaradılmalıdır: otaqda sərinlik (təxminən 21°C), 45%-dən yuxarı rütubət və tam qaranlıq təmin edilməlidir. Çünki melatonin hormonu yalnız qaranlıqda ifraz olunur. Bu səbəbdən yatmazdan əvvəl otaq havalandırılmalı, işıqlar söndürülməli və pərdələr çəkilməlidir.

Ekranlı cihazlar - telefon, planşet, kompüter - yuxudan ən azı 1-2 saat əvvəl kənara qoyulmalıdır. Çünki bu cihazların yaydığı mavi işıq beynin melatonin istehsalına mane olur. Yatmazdan əvvəl sakitləşdirici fəaliyyətlər - gəzinti, nəfəs məşqləri, meditasiya və ya isti vanna - tövsiyə olunur. Bunlar stresi azaldır və əzələ gərginliyini aradan qaldırır", - deyə nevroloq bildirib.

"Nə ac qalın, nə də ağır qidalar yeyin"

Həkim axşam saatlarında ağır yeməklərdən uzaq durmağı da tövsiyə edib.

"Yağlı və ədviyyatlı yeməklər narahatlıq yarada bilər. Amma ac yatmaq da düzgün deyil. Yüngül bir qəlyanaltı - məsələn, bir banan və ya ovuc içi qədər qoz-fındıq - daha rahat yuxuya getməyə kömək edə bilər.

Şirin, kofeinli və spirtli içkilər isə yuxudan təxminən 5-6 saat əvvəl qəbul edilməməlidir. Onların əvəzinə çobanyastığı, melissa, nanə çayı və ya isti süd içmək tövsiyə olunur. Bu içkilər sinir sistemini sakitləşdirir və yuxunu asanlaşdırır", - deyə Yekaterina Demyanovskaya sözlərini yekunlaşdırıb.

Telegramda izləyin