Quruması üçün sərilən xalçanı oğurlayıb "bit bazarı"nda satdı

Bakıda yaşadığı binanın qarşısında quruması üçün asılmış xalçanı oğurlayaraq "bit bazarı"nda satan şəxs həbs olunub.

Sonxeber.az "Qaynarinfo"ya istinadən xəbər verir ki, 1989-cu il təvəllüdlü K.R. saxlanılıb və barəsində İnzibati Xətalar Məcəlləsinin 227-ci maddəsinə əsasən protokol tərtib edilərək iş məhkəməyə göndərilib.

Məhkəmədə müəyyən olunub ki, zərərçəkmiş V.X. saat 15 radələrində dörd kvadratmetr ölçüsündə olan xalçanı quruması üçün yaşadığı binanın qarşısındakı dəmir dirəyə asıb. Axşam saat 22 radələrində xalçanı götürmək istədikdə, onun oğurlandığını aşkarlayıb.

Aparılan araşdırmalar nəticəsində məlum olub ki, oğurluq hadisəsi V.X.-nın qonşusu K.R. tərəfindən törədilib. K.R. xalçanı "bit bazarı"nda fəaliyyət göstərən satıcılardan birinə 60 manata satıb. Zərərçəkmiş isə dəyəri 400 manatdan artıq olan xalçanı həmin bazarda görərək geri alıb.

Məhkəmənin qərarına əsasən, təqsirləndirilən şəxsə 15 sutka müddətinə inzibati həbs cəzası verilib.

Telegramda izləyin