Aldadıldığını öyrənən qadın əri və qayınanası tərəfindən zəhərlənərək öldürüldü

Braziliyanın Ribeirao Preto şəhərində dəhşətli bir ailə faciəsi baş verib. 37 yaşlı pilates məşqçisi Larissa Talle Leoncio Rodrigues, həyat yoldaşının onu aldatdığını öyrəndikdən sonra boşanmaq qərarı alıb. Lakin polisə görə, cərrah olan əri Luiz Antonio Garnica və qayınanası Elizabete Arrabaça bu qərarı qəbul etməyərək Larissanı zəhərləyərək qətlə yetiriblər.

Sonxeber.az xarici mediaya istinadən xəbər verir ki, istintaq materiallarına əsasən, qayınana "chumbinho" adlı kənd təsərrüfatı zəhərini Larissanın yeməyinə qatıb. Dedektiv Fernando Bravo bildirib ki, qadın ölümündən təxminən iki həftə əvvəl qayınanası bu zəhəri əldə etmək üçün axtarışlar aparıb və tanış bir fermerlə əlaqə saxlayıb.

Qadının qanında aparılan toksikoloji analizlər zəhər izlərini təsdiqləyib. Bundan əlavə, Larissa yaxın dostlarına, qayınanası evdə olanda tez-tez halının pisləşdiyini söyləyib.

Ərinin davranışları da polisə şübhəli görünüb. O, Larissanı hamamda tapdığını və həkim olduğu üçün müdaxilə etməyə çalışdığını iddia etsə də, araşdırma zamanı onun hadisə yerində sübutları yox etməyə çalışdığı müəyyən edilib.

Cinayətlə bağlı daha bir maraqlı detal isə odur ki, Luiz Garnica cinayətdən bir gün əvvəl sevgilisi ilə kinoya gedərək özünə alibi – yəni hadisə zamanı başqa yerdə olduğunu sübut edəcək bəhanə yaratmağa çalışıb.

Hazırda həm ər, həm də qayınana həbs edilib. Polis eyni zamanda ərlə əlaqədə olan qadını da dindirərək istintaqı genişləndirir.

Telegramda izləyin