ABŞ-da şok hadisə: 7 və 9 yaşlı uşaqlar əllərində silahla polisə müqavimət göstərdi - VİDEO

ABŞ-ın Nyu-Meksiko ştatında baş verən inanılmaz hadisədə 7 və 9 yaşlı iki azyaşlı uşaq, əllərindəki gerçək silahı yerə qoymaqdan imtina etdikləri üçün polis müdaxiləsi ilə qarşılaşıblar.

Sonxeber.az xarici mediaya istinadən xəbər verir ki, yayılan görüntülərdə uşaqların bir binanın kənarında, kondisioner qurğusunun arxasında gizləndikləri görünür. Onlar Minecraft və Ulduz Müharibələri temalı pijamalar geyinmiş və əllərində dolu tapança tutmuşdular.

Polislər əvvəlcə vəziyyəti sakit yolla həll etməyə çalışıblar. Polis əməkdaşının gövdə kamerasına düşən görüntülərdə onun uşaqlara belə dediyi eşidilir: "Canım, onu yerə qoy. Sən çətin vəziyyətdə deyilsən, sadəcə silahı yerə qoy və bizimlə danış".

Lakin uşaqlar silahı təhvil verməkdən imtina etdikdən sonra polis əməkdaşları məcburən rezin güllədən istifadə ediblər. Buna baxmayaraq, uşaqlar silahı əllərindən buraxmayıblar. Nəhayət, polis əməkdaşları onları mühasirəyə alaraq silahı təhlükəsiz şəkildə ələ keçirə biliblər.

Bernalillo County Şerifi Con Allen bildirib ki, hadisə 16 fevralda baş verib və həmin evlə bağlı əvvəllər də onlarla şikayət daxil olub. Şerif Allen qeyd edib: "Bu hadisə uşaq cinayətləri, psixi sağlamlıq və ictimai təhlükəsizlik arasındakı mürəkkəb münasibətləri nümayiş etdirir."

Təəccüblü haldır ki, uşaqlar nə həbs olunub, nə də ailələrindən ayrılıblar. Yalnız silah müsadirə olunub. Şerif Allen bu qərarı belə əsaslandırıb: "Uşaqlar bizim gələcəyimizdir. Bəziləri deyəcək ki, onları həbs edin, amma onlar sadəcə 7 və 9 yaşındadır."

Polis idarəsi bildirib ki, hadisənin ölümlə nəticələnməməsində dron texnologiyasının rolu böyük olub və hazırda uşaqlara psixoloji yardım göstərilir. Silahın onların əlinə necə keçdiyi isə hələ də məlum deyil.

Telegramda izləyin