Zibil qutusundan insan kəllə sümüyü tapıldı: 30 illik sirr ortaya çıxdı - VİDEO

Adananın Seyhan rayonunun Gürselpaşa məhəlləsində baş verən hadisə hər kəsi təəccübləndirib.

Sonxeber.az türk mediasına istinadən xəbər verir ki, 9 may saat 11:30 radələrində Mavi Bulvar üzərində yerləşən bir binanın həyətində işləyən 40 yaşlı İsa Kaplan zibil konteynerindəki torbalardan birində kağıza bükülmüş insan kəllə sümüyü tapıb.

Hadisə qarşısında təlaşa düşən Kaplan dərhal bu barədə binanın mühafizəçisinə məlumat verib. Daxil olan məlumat əsasında əraziyə polis və hadisə yeri mütəxəssisləri cəlb olunub. İlkin araşdırmalarda kəllə sümüyünün uşağa aid ola biləcəyi ehtimal olunub və həmin sümük Adana Məhkəmə-Tibbi Ekspertiza İnstitutuna göndərilib.

Başlanan araşdırmalar zamanı Cinayət Axtarış Şöbəsinin əməkdaşları ərazidəki təhlükəsizlik kameralarını incələyiblər. Nəticədə məlum olub ki, kəllə sümüyü Yüreğir Dövlət Xəstəxanasında çalışan 51 yaşlı ağciyər xəstəlikləri üzrə mütəxəssis həkim G.S.-nin evində temizlik aparan həyat yoldaşı, 42 yaşlı müəllim G.I.S. tərəfindən zibilə atılıb.

Bu vaxt həkim G.S.-nin Van şəhərində seminar üçün olduğu məlum olub. Hadisə ilə bağlı xəbərləri eşidən kimi polisə müraciət edib. Onun ifadəsində 1994-cü ildə Ege Universiteti Tibb Fakültəsində təhsil aldığı dövrdə Hatayın Samandağ rayonundakı qəbiristanlıq işçisindən tədris məqsədilə bu kəllə sümüyünü əldə etdiyi və həmin vaxtdan evində saxladığı ortaya çıxıb.

G.S. ifadəsində, "Təhsil məqsədilə istifadə etmişdim. Gələcəkdə başqa tələbələr üçün də faydalı ola biləcəyini düşündüyüm üçün saxlamışdım", - deyə bildirib.

Məhkəməyə çıxarılan həkim G.S. barəsində ədli nəzarət şərti ilə sərbəst buraxılma qərarı verilib. Kəllə sümüyü üzərində Məhkəmə-Tibbi Ekspertiza tərəfindən araşdırmalar davam etdirilir.

Telegramda izləyin