Havada dəhşət dolu anlar: Hava Limanına eniş edən təyyarənin mühərriki sıradan çıxdı - VİDEO

İstanbul Sabiha Gökçen Hava Limanına eniş etməyə hazırlaşan Qatar Hava Yollarına məxsus sərnişin təyyarəsinin mühərriklərindən biri havada nasazlıq səbəbilə dayanıb.

Sonxeber.az türk mediasına istinadən xəbər verir ki, təyyarə bir müddət havada dövrə vurduqdan sonra tək mühərriklə təhlükəsiz şəkildə eniş edib.

Hadisə saat 19:10 radələrində baş verib. Məlumata görə, Doha–İstanbul Sabiha Gökçen reysini yerinə yetirən təyyarə Bursa üzərində uçuş zamanı mühərriklərindən birində nasazlıq qeydə alınıb. Pilot dərhal Hava Trafikə məlumat verərək təcili vəziyyət elan edib.

Təyyarə bir müddət Bursa səmasında dövrə vurduqdan sonra Sabiha Gökçen Hava Limanına enişə başlayıb. Bu zaman HEAŞ-a (Havaalanı İşletme və Havacılıq Sənayesi A.Ş) məxsus Xilasetmə və Yanğınla Mübarizə Xidmətləri (ARFF) ilə tibbi qruplar ehtiyat tədbiri olaraq pistdə gözləməyə başlayıblar.

Təyyarə tək mühərriklə uğurla eniş etdikdən sonra ARFF qrupları təxminən 8 dəqiqə ərzində onu parkinq mövqeyinə çəkiblər. Mühərrik nasazlığı səbəbindən təyyarənin növbəti İstanbul–Doha reysi isə ləğv edilib.

Telegramda izləyin