Boşanma qalmaqalı qanla bitdi: bıçaqlı davada bir nəfər öldü, üç nəfər yaralandı

Hatayın Antakya rayonunun Narlıca məhəlləsində mayın 12-si gecə saatlarında baş verən bıçaqlı dava bir nəfərin ölümü, üç nəfərin isə yaralanması ilə nəticələnib.

Sonxeber.az türk mediasına istinadən xəbər verir ki, boşanma ərəfəsində olan 23 yaşlı A.S., 22 yaşlı qardaşıoğlu B.Ç. ilə birlikdə keçmiş həyat yoldaşının qardaşı – 23 yaşlı Ahmet Yıldırımın Narlıca məhəlləsində yerləşən iş yerinə gəlib. İddialara görə, tərəflər arasında yaranan sözlü mübahisə qısa müddətdə bıçaqlı davaya çevrilib.

Hadisə nəticəsində Ahmet Yıldırım sinəsinin alt nahiyəsindən ağır bıçaq zərbəsi alıb, qardaşı M.E.Y. isə bədəninin müxtəlif hissələrindən yaralanıb. A.S. sinəsindən, B.Ç. isə qarının aşağı hissəsindən aldığı bıçaq xəsarətləri ilə yaralanıblar.

Yaralılar hadisə yerində ilkin tibbi yardım aldıqdan sonra ətrafdakı xəstəxanalara yerləşdirilib. Lakin Ahmet Yıldırım həkimlərin səylərinə baxmayaraq xəstəxanada həyatını itirib. Digər üç yaralının müalicəsi davam edir.

Araşdırmalar zamanı A.S.-nin əvvəllər qəsdən xəsarət yetirmə və dələduzluq da daxil olmaqla, yeddi müxtəlif cinayət işi üzrə məhkumluğunun olduğu məlum olub.

Polis hadisə ilə bağlı istintaqa başlayıb, ərazidə isə gücləndirilmiş təhlükəsizlik tədbirləri görülüb.

Telegramda izləyin