Yanğın zamanı təşvişə düşən qadın özünü 8-ci mərtəbədən atdı - VİDEO

İstanbulun Esenyurt rayonunda çoxmərtəbəli yaşayış binasında baş verən yanğın faciə ilə nəticələnib.

Sonxeber.az türk mediasına istinadən xəbər verir ki, gecə saat 02:00 radələrində Koza məhəlləsində yerləşən 11 mərtəbəli binanın 8-ci mərtəbəsində başlayan yanğın qısa müddətdə bütün mənzili bürüyüb. Bu zaman mənzildə tək yaşayan 37 yaşlı E.D. adlı qadın dəhşət və təşviş içində özünü 8-ci mərtəbədən aşağı atıb.

Xilasedici heyətin açdığı təhlükəsizlik örtüyünün üzərinə düşən qadın ağır xəsarət alıb. Təcili tibbi yardım əməkdaşları ona yerində ilkin yardım göstərdikdən sonra qadını Başakşehir Çam və Sakura Şəhər Xəstəxanasına çatdırıblar.

Hadisə yerinə cəlb olunan yanğınsöndürənlərin səyi nəticəsində alovun digər mənzillərə keçməsinin qarşısı alınıb və yanğın tamamilə söndürülüb.

Faktla bağlı araşdırma aparılır.

Telegramda izləyin