Kapadokyada isti hava şarı qəzası: turistlər qayalıqlarda köməksiz qaldı

Türkiyənin Nevşəhər vilayətinin Avanos rayonunda, Zelve Ören Yeri yaxınlığında bu səhər saatlarında havaya qalxan isti hava şarı saat 08:00 radələrində qayalıqlara məcburi eniş edib.

Sonxeber.az türk mediasına istinadən xəbər verir ki, Şarda olan 20 turist təxminən 50 metr yüksəklikdəki qayalıq əraziyə endirilib. Hadisə barədə məlumat verildikdən sonra əraziyə Fövqəladə Halların İdarə Olunması Agentliyinin (AFAD) və yanğınsöndürmə xidmətinin əməkdaşları cəlb olunub.

Yanğınsöndürmə xidmətinin müdaxiləsindən sonra isti hava şarı yenidən havaya qalxıb. Qayalıqlarda köməksiz qalan 20 turist xilas edilib.

Nevşəhər Valiliyi məsələ ilə bağlı açıqlama verib: "Bu gün saat 05:00-da vilayətimizin Çavuşin bölgəsindən havaya qalxan isti hava şarı, uçuş müddətinin başa çatması səbəbilə saat 06:00 radələrində Zelve Ören Yeri yaxınlığında yamacda məcburi eniş edib. Şar, hava şəraiti və uçuş prosesi nəzərə alınaraq pilotun təşəbbüsü ilə nəzarətli şəkildə endirilib. Hadisə nəticəsində hər hansı bir xəsarət qeydə alınmayıb. Balonda olan sərnişinlər AFAD əməkdaşlarının çevik müdaxiləsi ilə sağlam şəkildə təxliyə olunub. Hadisə ilə bağlı müvafiq inzibati araşdırma başladılıb".

Telegramda izləyin