Dava çağırışına gedən polis qrupuna it hücumu: 2 polis yaralandı

Türkiyənin Bartın şəhərində dava ilə bağlı çağırış alan motosikletli polis əməkdaşları hadisə yerinə gedərkən it hücumuna məruz qalıb. Hadisə nəticəsində motosiklet aşıb və iki polis əməkdaşı xəsarət alaraq xəstəxanaya yerləşdirilib.

Sonxeber.az türk mediasına istinadən xəbər verir ki, məlumata görə, Bartının Kanlırmak küçəsində motosikletli yunus polis qrupları davaya dair edilən çağırış üzrə hadisə yerinə hərəkət ediblər. Bu zaman küçədən keçən avtomobillərə hücum edən bir it, polis əməkdaşlarının olduğu motosikletə doğru atılıb.

Sürücünün manevr etməsi nəticəsində motosiklet aşıb və üzərində olan polis əməkdaşları Ü.Ö. və F.Ç. müxtəlif dərəcəli bədən xəsarətləri alıblar. Hadisə yerinə dərhal çox sayda polis, yanğınsöndürən və təcili yardım qrupları cəlb edilib. Yaralı polislərə ilkin tibbi yardım həm onların həmkarları, həm də təcili tibbi yardım əməkdaşları tərəfindən göstərilib.

Sonra yaralılar Bartın Dövlət Xəstəxanasına aparılaraq müalicəyə götürülüblər. Onların vəziyyətinin yaxşı olduğu bildirilib. Bartın Polis İdarəsinin rəisi Ünsal Hayal da xəstəxanaya gələrək yaralı əməkdaşları ziyarət edib.

Polis qruplarına hücum edən itin sahibli olduğu müəyyən edilib və adı açıqlanmayan sahibinə qarşı hüquqi tədbirlər başladılıb.

Telegramda izləyin