Sabirabad sakini toyda içib əmisi oğlunun kafesini dağıtdı

Sabirabadda sərxoş kişi toydan çıxıb kafeyə hücum edib.

Oxu.Az-ın məlumatına görə, hadisə rayonun Həşimxanlı kəndində baş verib. Kənd sakini Faiq Hüseynov qohumunun toyunda spirtli içki qəbul edib sərxoş vəziyyətdə kənd ərazisində, əmisi oğluna məxsus kafeyə gəlib. O, kafedə əyləşərək əmisi nəvəsi Namil Hüseynovu çağırıb və ona çay süzməsini əmr edib. Namil çayniki onun qarşısına qoyaraq stəkana özünün süzməsini istəyib. Nəticədə qohumlar arasında mübahisə yaranıb, F.Hüseyov çayniki və stəkanı Namil Hüseynova tərəf tullayıb.

Müştərilər onu sakitləşdirib kafedən çıxarsa da, o, sonradan geri qayıdaraq kafedə olan bütün stəkanları, pivə bokalları və boşqabları qırıb. Bununla ürəyi soyumayan Faiq Hüseynov Namili baş zərbəsi ilə vuraraq ona xəsarət yetirib.

Məhkəmə istintaqı müddətində qohumlar barışıblar.

Məhkəmə tərəflərin barışdığını nəzərə alaraq F.Hüseynova 1000 manat cərimə cəzası təyin edib.

Telegramda izləyin