Tramp ad günü üçün fantastik məbləğ xərcləyəcək - Tanklar, orkestr...

ABŞ prezidenti Donald Tramp 79-cu doğum günü münasibətilə Vaşinqtonda təşkil olunacaq hərbi parada təxminən 45 milyon dollar xərcləyəcək.

Milli.Az xəbər verir ki, parad həm də ABŞ ordusunun 250 illiyinə həsr olunacaq.

Amerika rəsmilərinin hesablamalarına görə, parad Vaşinqton küçələrinə 16 milyon dollaradək ziyan vura bilər.

Tədbir zamanı 28 M1A1 tankı, 28 Bradley döyüş maşını, 28 Stryker zirehli texnikası və müxtəlif artilleriya sistemləri olmaqla ümumilikdə 130-a yaxın texnika iştirak edəcək.

Parad marşrutunda 50-dən çox helikopter havaya qalxacaq, 7000 əsgər küçələrdən keçəcək. Əlavə olaraq, səkkiz orkestr, onlarla at və iki qatır da paradda yer alacaq.

NBC News-un məlumatına görə, ordu şəhər infrastrukturuna dəyəcək ziyanı qarşılamağı planlaşdırır. Yalnız küçə təmiri xərcləri 16 milyon dollar təşkil edə bilər. Tankların hərəkəti üçün əraziyə 20 fut hündürlüyündə metal lövhələr yerləşdiriləcək - bu da əlavə 3 milyon dollar xərc deməkdir.

Vaşinqton meri Muriel Bouzer zirehli texnikanın şəhər infrastrukturuna vuracağı zərərin miqyasından narahat olduğunu bildirib.

Donald Tramp isə NBC News-a verdiyi açıqlamada 90 dəqiqəlik paradı "göz yaşardacaq qədər dəyərli" adlandırıb və yüksək xərcləri haqlı saydığını bildirib.

Telegramda izləyin