Həbsdə planşet işlədən eks-vəzifəli şəxsin cəzası AZALDILDI

Bakı Apellyasiya Məhkəməsində cəzaçəkmə müəssisələrində qadağan olunmuş əşyalar saxlamaqda təqsirləndirilən Qadir Quliyevin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası yekunlaşıb.

Sonxeber.az Pravda.az-a istinadən xəbər verir ki, sonuncu keçirilən prosesdə qərar elan olunub.

Qərara əsasən, apellyasiya şikayəti təmin edilib, Qaradağ Rayon Məhkəməsinin hökmü dəyişdirilib, ona qəti olaraq 1 il 5 ay müddətinə azadlıqdan məhrumetmə cəzası təyin edilib.

İttihama görə, Qadir Quliyev Ədliyyə Nazirliyi Penitensiar Xidmətin 13 saylı cəzaçəkmə müəssisəsində cəza çəkdiyi müddətdə məlum olmayan vaxtda və mənbədən qadağan olunmuş 1 ədəd "Samsung" markalı planşet, 1 ədəd "Apple Airpods" markalı naqilsiz qulaqcıq, 1 ədəd smart saat, 1 ədəd elektrik qidalandırıcısı, otaqdakı elektrik yuvasında olan 1 ədəd elektrik qidalandırıcısı, 1 ədəd "Nokıa WİFİ" markalı router və dolabda olan 1 litr həcmli şüşə butulkada spirtli içkini əldə edərək özündə saxlayıb. Ötən il saat 23:10-də Penitensiar Xidmətin 13 saylı Cəzaçəkmə müəssisənin inzibati binasının yaxınlığında yerləşən təsərrüfat təyinatlı otaqda Penitensiar Xidmətin Əməliyyat-Rejim İdarəsinin əməkdaşları tərəfindən keçirilmiş qəfil axtarış-baxış tədbirləri nəticəsində ona məxsus yataq yerindən açıq aşkar şəraitdə saxladığı həmin əşyalar aşkar edilərək götürülüb.

Qaradağ Rayon Məhkəməsinin hökmü ilə təqsirləndirilən şəxs 1 il 7 ay müddətinə azadlıqdan məhrum edilib.

Hökmdən narazı qalan məhkum apellyasiya şikayəti verərək, birinci instansiya məhkəməsinin hökmünün dəyişdirilməsini, ona daha yüngül cəza təyin edilməsini xahiş etmişdi.

Qeyd edək ki, Qadir Quliyev Cinayət Məcəlləsinin 178.2.2-ci (dələduzluq), 178.2.3, 178.2.4, 179.3.2-ci (mənimsəmə), 308.2 (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə təqsirli bilinərək 4 il 4 a ay müddətinə azadlıqdan məhrum edilmişdi.

Telegramda izləyin