"Azərbaycanın enerji sahəsində əsas planlarından biri hasilatı daha da artırmaqdır" - DEPUTAT

"2 iyun 2025-ci il tarixdə Ölkə Başçısı cənab İlham Əliyev Bakı Enerji Həftəsi çərçivəsində keçirilən açılış mərasimində çıxış edərkən Azərbaycanın neft-qaz sənayesi sahəsində bir çox uğurlu layihələrə imza atdığını və ölkəmizin neft strategiyasında çox böyük nailiyyətlər əldə etdiyini tədbir iştirakçılarının diqqətinə çatdırmışdır. Bu nailiyyətlər hələ Ulu Öndər Heydər Əliyevin hakimiyyəti dövründə, yəni 1994-cü ildə ilk olaraq neft-qaz sərgisinin təşkil edilməsi ilə başlayaraq, daha sonra Azərbaycan beynəlxalq neft şirkətləri konsorsiumu ilə, bundan sonra isə "Əsrin müqaviləsi"nin imzalanması ilə davam etmişdir".

Bu sözləri Sonxeber.az-a Milli Məclisin deputatı Pərvanə Vəliyeva danışıb.

O, açıqlamasında qeyd edib ki, Azərbaycanın çətin iqtisadi böhran yaşadığı bir dövrdə ölkənin sosial-iqtisadi durmunun düzəldilməsini məhz enerji sahəsinin inkişaf etdirilməsində görən Ümummilli Lider Heydər Əliyev bu istiqamətdə beynəlxalq əməkdaşlıqlar qurmağa, dünyanın bir çox ölkələri ilə müqavilələr imzalamağa üstünlük vermişdir:

"O zamanlar Azərbaycan bəzi xarici investorlar üçün riskli ölkə hesab olunsa da, Ulu Öndər ölkənin və xalqın ağır iqtisadi vəziyyətdən qurtulmasının çıxış yolunu enerji sahəsinin inkişaf etdirilməsində və bununla bağlı bir sıra layihələrə imza atmaqda görürdü.

Həmin siyasi kursun davamçısı olan Prezident İlham Əliyev də bu gün enerji sahəsində bir çox nəhəng layihələrin imzalanması və həyata keçirilməsi istiqamətində mühün tədbirlər görmüş, bu sahədə ölkəmizin böyük uğurlar qazanmasına çalışmışdır.

Bu gün ölkəmiz həyata keçirdiyi genişmiqyaslı islahatlar səyasində sabit siyasi sistemə və inkişaf etməkdə olan iqtisadiyyata malikdir. Azərbaycanın ÜDM-də neft və qaz üzrə payı təqribən 30 faizdən artıqdır. Hətta ölkəmizin xarici borcunun səviyyəsi ÜDM-in 7 faizindən aşağıdır, maliyyə ehtiyatları isə borcunu 14 dəfə üstələyir. Hazırda ölkədə bu gün yoxsulluq səviyyəsi 5 faizə bərabərdir. Bütün bu müsbət göstəricilər təbii ki, Azərbaycanın iqtisadiyyatını düzgün və səmərəli inkişaf etdirməsinin nəticəsidir.

Enerji sahəsində ölkəmizin ən uğurlu addımlarından biri öz tərəfdaşları ilə birlikdə Xəzər dənizini Qara və Aralıq dənizləri ilə birləşdirən strateji boru kəmərlərinin inşa edilməsidir. Bu gün Azərbaycan Avrasiyanın vacib nəqliyyat qovşaqlarından biridir. Bu dövlətimizin infrastruktur layihələrinə çox böyük sərmayə yatırmasından irəli gəlir. Hətta Azərbaycanın enerji layihələri sayəsində Avrasiyanın enerji xəritəsi yenidən tərtib edilmişdir. Bu uğurlu addımların ən önəmlisi Azərbaycanın dəniz yataqlarından İtaliyanın sahilinə qədər uzanan 3500 kilometrlik Cənub Qaz Dəhlizidir.

Ölkəmizin enerji sahəsinə bu cür diqqət göstərməsi və kifayət qədər səramayə yatırması əlbəttə ki, həm Azərbaycanın, həm də bir çox ölkələrin enerji təhlükəsizliyinin təmin edilməsində əhəmiyyətli rol oynayacaqdır.

Bu gün Azərbaycan 12 ölkəyə təbii qaz ixrac edir və eləcə də ixrac ediləcək ölkələrin sayının artırılması üçü bəzi dövlətlərlə də danışıqlar və sərmayə qoyuluşu mərhələsindədir. Bu baxımından Azərbaycan artıq qlobal səviyyədə aparıcı dövlətə çevrilmişdir.

Azərbaycanın enerji sahəsində əsas planlarından biri hasilatı daha da artırmaqdır. Ötən il ölkənin təbii qaz ixracı 25 milyard kubmetr olmuşdur və 2030-cu ilədək qaz ixracını daha 8 milyard kubmetrə qədər artırılması nəzərdə tutulur. Eyni zamanda dövlətimiz 2030-cu ilədək 6,5 giqavat həcmində istehsal edilə biləcək bərpaolunan enerji gücünə malik olacaqdır ki, bu da ölkənin ümumi enerji istehsalının 35 faizdən çoxunu təşkil edəcək.

Azərbaycan xarici investorlarla bərabər yaşıl enerjiyə də sərmayə qoyulmasında maraqlıdır və bu istiqamətdə də nailiyyətlər əldə edir. Ölkənin yaşıl enerji potensialı sayəsində Azərbaycanın elektrik enerjisinə artan tələbatı xüsusilə bərpaolunan enerji hesabına təmin ediləcəkdir. Azərbaycanın yaşıl enerji ilə barabər təbii qazın hasilatının həcmini artırmaqda məqsədi, təbii qaza ehtiyacı olan ölkələrdir ki, dövlətimiz bu tələbatı ödəməyi düşünür. Eyni zamanda, ölkəmiz tərəfdaşları ilə birlikdə yaşıl enerji layihələrinə də yatırım edir.

Ötən il ölkəmizdə keçirilmiş "COP29"un "Bakı sıçrayışı" adlandırılması Azərbaycanın bir çox hədəflərə nail olması ilə bağlıdır. Xüsusilə İtki və Zərər Fondu və inkişafda olan ölkələr üçün nəzərdə tutulmuş yardımın 100 milyard dollardan 300 milyard dollara qədər artırılması ölkəmizin nailiyyəti kimi qiymətləndirlir. Həmçinin 10 il davam edən müzakirələrdən sonra karbon bazarının da işlək vəziyyətə gətirilməsi Azərbaycanın uğurlu addımlarından hesab olunur. Azərbaycanın COP29-la bağlı başqa bir hədəfi də Qlobal Cənub və Qlobal Şimal arasında körpünün qurulması idi ki, ölkəmiz buna nail ola bilmişdir".

Telegramda izləyin