Azərbaycanın dayanıqlı inkişaf strategiyası və regional islahatlar - RƏY

Regionların sosial-iqtisadi inkişafının təşviq edilməsi istiqamətində mövcud siyasət, ölkəmizin uzunmüddətli inkişaf strategiyasının əsas sütunlarından birini təşkil edir. Dövlətimizin həyata keçirdiyi məqsədyönlü proqramlar və layihələr regionların potensial imkanlarını üzə çıxarmağa, iqtisadi və sosial tarazlığı təmin etməyə xidmət edir. Bu siyasət çərçivəsində həm infrastruktur, həm də sosial sahələrdə böyük irəliləyişlər əldə olunub və bu proses davam etməkdədir.

Mövzu ilə bağlı Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, bildirib ki, regionların sosial-iqtisadi inkişafı Azərbaycan Respublikasının dövlət siyasətinin prioritet istiqamətlərindən biridir və bu istiqamətdə Milli Məclis üzərinə düşən qanunverici təşəbbüsləri ardıcıl şəkildə həyata keçirir:

"Ölkə Prezidenti cənab İlham Əliyevin rəhbərliyi ilə qəbul edilmiş və uğurla icra olunan "Regionların sosial-iqtisadi inkişafı Dövlət Proqramları" çərçivəsində yüzlərlə infrastruktur layihəsi reallaşdırılıb, yollar, elektrik və qaz xətləri çəkilib, məktəb və tibb müəssisələri istifadəyə verilib, yeni sənaye məhəllələri və aqroparklar yaradılıb.

Parlament olaraq biz bu prosesin hüquqi və iqtisadi əsaslarını möhkəmləndirmək üçün yeni təşviq mexanizmlərinin yaradılması və yeni stimullaşdırıcı qərarların inkişaf etdirilməsi üçün mütəmadi olaraq fikir mübadiləsi aparırıq və qərarlar qəbul edirik. Bu istiqamətdə regionlarda sahibkarlığın inkişafına dəstək olmaq məqsədilə sadələşdirilmiş vergi güzəştlərinin tətbiqi , kənd təsərrüfatına və emal sənayesini daha əlçatan edən, bu sahəyə marağın artırılması istiqamətində qanunvericilik təşəbbüslərini dəstəkləyirik.

Ölkəmizin regional inkişaf strategiyası dövlət siyasətinin əsas prioritetlərindən biri olmaqla, əhalinin rifah halının yüksəldilməsinə yönəlib və bu sahədə həyata keçirilən bütün tədbirlər milli maraqlara tam bağlıdır və uzunmüddətli strateji hədəflərə xidmət edir".

Mövzu ilə bağlı Sonxeber.az-a danışan politoloq İlyas Hüseynov isə qeyd etdi ki, regionların sosial-iqtisadi inkişafı proqramı Cənab Prezident İlham Əliyev tərəfindən təsdiqlənir və qarşıdakı illərdə regionun hərtərəfli inkişafı baxımından mühüm əhəmiyyət kəsb edir.

"Bu proqramda regionun cari problemləri, spesifik xüsusiyyətləri, eləcə də uzun illər mövcud olmayan infrastrukturun yaradılması məsələləri xüsusi diqqətdə saxlanılır. Lakin son 5 ildə regionların sosial-iqtisadi inkişafı tamamilə yeni bir mərhələyə qədəm qoyub və bu, Müzəffər Ali Baş Komandan Cənab Prezident İlham Əliyevin regional siyasətdəki tarixi uğurları ilə birbaşa bağlıdır. Qarabağın və Şərqi Zəngəzurun işğaldan azad edilməsi bölgələrimizin inkişafı baxımından yeni bir mərhələnin başlanğıcı oldu. Bu gün Qarabağ və Şərqi Zəngəzur ərazilərində həm minalardan təmizləmə işləri aparılır, həm də mühüm infrastruktur layihələri həyata keçirilir. Yeni inzibati və yaşayış binaları inşa olunur və əlbəttə ki, keçmiş məcburi köçkünlərimiz doğma yurdlarına qayıdırlar. Bu proseslər bir-biri ilə sıx bağlı və mürəkkəbdir. Azərbaycan dövləti burada öz gücünə və iqtisadi potensialına arxalanır və elə məhz iqtisadi gücümüz sayəsində torpaqlarımızın işğaldan azad olunmasına nail olduq. Hazırkı reallıqlarda nəinki Qarabağın və Şərqi Zəngəzurun, bütövlükdə ölkəmizin dayanıqlı və hərtərəfli inkişafını təmin etmək üçün mühüm tədbirlər həyata keçirilir və bu tədbirlər regional və qlobal çağırışlar fonunda reallaşdırılır. Hesab edirəm ki, burada vacib siyasət mexanizmləri tətbiq olunur, eyni zamanda dərin islahatlar həyata keçirilir. Struktur, insan və kadr islahatları da bu baxımdan xüsusi əhəmiyyət kəsb edir. Düşünürəm ki, yaxın illərdə qarşıya qoyulan bütün məqsədlərə nail ola biləcəyik".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Regionların sosial-iqtiasdi inkişafının təşviq edilməsi" mövzusuna uyğun olaraq dərc edilir.

Telegramda izləyin