"Bölgələrimizdəki vəziyyət əvvəlki illərlə müqayisədə tamamilə dəyişib" - DEPUTAT

"Bu gün Azərbaycanın inkişafı yalnız onun paytaxtının hesabına deyil, regionlarının da hesabına baş verir. Bölgələrimizdəki vəziyyət əvvəlki illərlə müqayisədə tamamilə dəyişib. Son illər bölgələrimizdə aparılan quruculuq işləri regionların inkişaf potensialının artmasına, biznes və investisiya mühitinin, infrastruktur təminatının, kommunal xidmətlərin keyfiyyətinin yaxşılaşmasına, əhalinin rifahının yüksəlməsinə və ekoloji təhlükəsizliyin güclənməsinə şərait yaradıb".

Bu sözləri Sonxeber.az-a Milli Məclisin deputatı Müşfiq Cəfərov danışıb.

O, açıqlamasında qeyd edib ki, Azərbaycanda regionların inkişafına ölkənin davamlı həyata keçirilən sosial-iqtisadi inkişaf strategiyasının mühüm tərkib hissəsi kimi baxılır:

"Məhz bu yanaşmanın nəticəsində regionların inkişafı üzrə ayrıca dövlət proqramları hazırlanaraq icra edilir.

2004-cü ildən etibarən başlayaraq, bu istiqamətdə qəbul olunan dövlət proqramları regionların sosial-iqtisadi inkişafında və həm də regionların iqtisadi inkişafda payında mühüm irəliləyişlərin əldə edilməsinə səbəb olub.

Regionların sosial-iqtisadi inkişafı ilə bağlı dövlət proqramının icra olunması üçün 2019-cu ildən etibarən bu günə qədər xeyli vəsait sərf olunur. Ümumilikdə əldə olunan nəticələr xeyli müsbətdir. Həm sənayenin inkişafında, regionlarda sənaye parklarının qurulmasında, sənaye parklarında rezidentlərin sayının artırılmasında, həm kənd təsərrüfatının inkişafının sürətləndirilməsində, həm yeni iş yerlərinin açılmasında, həm regionlarımızda qaz, elektrik, su, yol infrastrukturunun yenidən qurulmasında görülən işlər Azərbaycan regionlarının inkişafını təmin edən mühüm tədbirlərdir".

Vüsalə İbrahimli

P.S. Yazı Azərbaycan Respublikası Medianın İnkişafı Agentliyinin maliyyə dəstəyi ilə "Regionların sosial-iqtiasdi inkişafının təşviq edilməsi" mövzusuna uyğun olaraq dərc edilir.

Telegramda izləyin