Gündə 200 dəfə jim edən 92 yaşlı çinli qadın heyrətləndirdi

Çin sakini olan 92 yaşındakı Li soyadlı qadın sosial şəbəkədə əsl sensasiyaya çevrilib. Yaşlı qadın hər gün məşqlər toplusunu yerinə yetirir ki, bu, hətta peşəkar idmançıları belə heyrətə gətirib. Qadın gündə 200 dəfə jim və 100 ayaqqaldırma hərəkəti edir.

Oxu.Az bu barədə "South China Morning Post"a istinadən xəbər verir.

Məlumata görə, Li bu yaxınlarda ənənəvi Çin təbabəti festivalında çıxış edərək, öz uzunömürlülük və aktivlik sirlərini bölüşüb. Lakin məhz onun fiziki hazırlığı internetin Çin seqmentində əsl ajiotaj doğurub.

"Mən məşqləri yerinə yetirərkən texnikanın mükəmməl olub-olmamasına elə də çox əhəmiyyət vermirəm, amma gündəlik məşqlərimi heç vaxt qaçırmıram", - deyə yaşlı qadın etiraf edib. Yaşının çox olmasına baxmayaraq, o, heyrətamiz elastiklik və hərəkətlər koordinasiyası nümayiş etdirir, halqanı belində asanlıqla fırladır və digər fiziki məşqləri yerinə yetirir.

Maraqlıdır ki, Li evdə idman etməyə üstünlük verir, xüsusən də onun bölgəsində tez-tez rast gəlinən yağışlı havalarda. Bu, ona öz məşqlərində nizam-intizamı qorumağa mane olmur.

Təqaüdçü qadının bir gözlənilməz açıqlaması isə xüsusilə diqqət cəlb edib. Li qeyd edib ki, müntəzəm fiziki yüklənmələr nəinki onun sağlamlığını yaxşılaşdırıb, həm də görünüşünə müsbət təsir göstərib. Qadının sözlərinə görə, onun boz saçları zaman keçdikcə nəzərəçarpacaq dərəcədə tündləşib - bu fenomen sosial şəbəkə istifadəçiləri arasında kifayət qədər müzakirələrə səbəb olub.

Fiziki məşqlərdən əlavə, xanım Li sağlamlığı qorumaq üçün daha bir ritual həyata keçirir - hər axşam o, ayaqlarını isti suya qoyur. Ənənəvi Çin təbabətinə əsasən, bu prosedur qan dövranının və bədənin ümumi sağlamlığının yaxşılaşmasına kömək edir.

92 yaşlı çinli qadının hekayəsi yaşın aktiv həyat tərzinə və fiziki inkişafa maneə törətmədiyinə dair ilhamverici nümunə kimi çıxış edir.

Telegramda izləyin