İsti havada rahat yuxuya getməyin BEŞ EFFEKTİV YOLU - Nevroloqdan məsləhət

Yayın istisi tez-tez yuxu pozğunluğuna səbəb olur, gecə istirahətini orqanizm üçün əsl sınağa çevirir. Yüksək temperatur keyfiyyətli yuxu üçün lazım olan bədən temperaturunun təbii azalmasına mane olur. Bu isə yuxusuzluğa və pis əhval-ruhiyyəyə gətirib çıxarır.

Oxu.Az-ın kp.ru-ya istinadla verdiyi məlumata görə, rusiyalı həkim-nevroloq, manual terapevt və idman həkimi Viktor Koss isti havada da keyfiyyətli yuxunun effektiv yollarını bölüşüb.

Mütəxəssis ilk olaraq elektron cihazların yuxuya mənfi təsirinə diqqət çəkib. Onun sözlərinə görə, ekranların yaydığı işıq sinir sistemini stimullaşdıraraq yuxuya getməni çətinləşdirir:

"Yatmazdan 1.5-2 saat əvvəl telefon və planşet kimi cihazlardan istifadə etməmək məsləhətdir", - deyə o bildirib.

Viktor Koss, həmçinin yatmazdan əvvəl bədənin soyumasını stimullaşdırmaq üçün duş qəbul etməyi tövsiyə edir. Bu, orqanizmin təbii soyuma prosesini işə salaraq rahat yuxuya getməyə kömək edir.

Rahatlama üçün həkim maraqlı bir üsul da təklif edir - ayaqları yuxarı qaldırmaq məşqi:

"Arxası üstə uzanıb ayaqları 10 dəqiqəlik divara söykəmək, ayaq əzələlərinin boşalmasına kömək edir", - deyə o izah edir.

Lakin Koss hipertoniya (yüksək təzyiq) xəstələrinə bu metodu yalnız həkimlə məsləhətləşdikdən sonra tətbiq etməyi tövsiyə edir.

Yuxudan əvvəl baş və üz nahiyəsinin yumşaq, dairəvi hərəkətlərlə masajı da gün ərzində yığılan gərginliyi azaltmaqda və sinirləri sakitləşdirməkdə təsirli üsullardan biridir. Xüsusilə alın, gicgah və boyun nahiyəsinə diqqət yetirmək tövsiyə olunur.

Nəhayət, yataq otağında tam qaranlığın təmin olunması da yuxunun keyfiyyətinə birbaşa təsir edir. Koss bu məqsədlə tünd rəngli və qalın pərdələrdən istifadə etməyi məsləhət görür.

Telegramda izləyin