Avtomobil kanala çırpıldı – 13 yaşlı uşaq faciəvi şəkildə öldü

Bursanın Kestel rayonunda baş verən ağır yol-nəqliyyat hadisəsi azyaşlının həyatına son qoyub.

Sonxeber.az türk mediasına istinadən xəbər verir ki, hadisə Kale məhəlləsində, Mandıras küçəsi ilə Ankara yolu küçəsinin kəsişdiyi ərazidə yerləşən su kanalında qeydə alınıb. A.Ç. idarə etdiyi 11-ABU-417 dövlət nömrə nişanlı avtomobilin sükan hakimiyyətini itirərək kanal kənarında oturan 13 yaşlı Murad Mehmetoğluna çırpılıb və nəqliyyat vasitəsi su kanalına düşüb.

Zərbənin təsiri ilə avtomobillə istinad divarı arasında sıxılan azyaşlı hadisə yerinə çağırılan təcili tibbi yardım briqadası tərəfindən ağır vəziyyətdə xəstəxanaya çatdırılıb. Lakin həkimlərin səylərinə baxmayaraq, Murad Mehmetoğlu həyatını xilas etmək mümkün olmayıb.

Avtomobil sürücüsünün vəziyyətinin stabil olduğu bildirilir. Hadisə ilə bağlı hüquq-mühafizə orqanları tərəfindən araşdırmalara başlanılıb.

Telegramda izləyin