7 ildir itkin olan qadının əri tərəfindən öldürüldüyü ortaya çıxdı

Antalyada təxminən 7 ildir itkin olan xarici əsilli qadının əri tərəfindən qətlə yetirildiyi müəyyən edilib.

Sonxeber.az xəbər verir ki, hadisə, 25 dekabr 2018-ci ildə M.E.U.-nun Muratpaşa Demircikara Polis Bölməsinə itkinlə bağlı müraciəti ilə başladı. M.E.U., həyat yoldaşı Elena Beyder Uslucanın 24 noyabrda evdən çıxdığını və bir ay ərzində geri dönmədiyini, xərçəng xəstəsi olduğunu və zaman-zaman evi tərk etdiyini iddia etmişdi.

Lakin aparılan ətraflı araşdırmalar nəticəsində Elena Beyder Uslucadan bu günə qədər heç bir xəbər alınmadığı, onun ölkədən çıxış qeydlərinin olmadığı və bank/telefon (HTS) məlumatlarının da şübhəli vəziyyəti dəstəklədiyi ortaya çıxdı.

Təxminən bir il davam edən texniki və fiziki izləmə nəticəsində məlum oldu ki, Usluca 2018-ci ilin 24–26 noyabr tarixləri arasında əri tərəfindən öldürülüb. Hadisədən sonra meyitin gizlədilməsində şübhəli M.E.U.-ya qardaşı R.U.-nun yardım etdiyi ehtimal olunur. Hər iki şəxs eyni vaxtda keçirilən əməliyyatla saxlanılıb.

M.E.U. ifadəsində həyat yoldaşı ilə mübahisə etdiyini, yaranan qarşıdurma zamanı onun yerə yıxılaraq öldüyünü, daha sonra meyiti Aksu Kumköy meşəlik ərazisində basdırdığını etiraf edib. Yer göstərmə zamanı qadına aid olduğu ehtimal edilən skelet qalıqları aşkarlanıb.

Məhkəməyə göndərilən şübhəlilərdən R.U. məhkəmə nəzarəti şərti ilə sərbəst buraxılıb, həyat yoldaşı M.E.U. isə həbs edilərək cəzaçəkmə müəssisəsinə göndərilib.

Telegramda izləyin