Qəddar ana və ata ağladığı üçün körpələrini öldürdü

ABŞ-ın Texas ştatında 4 aylıq körpələrini bir siyirtməyə (çekmece) qoyaraq ölümünə səbəb olduqları iddia edilən ana və ata, hadisədən bir il sonra qətl ittihamı ilə həbs edilib.

Sonxeber.az xarici mediaya istinadən xəbər verir ki, 38 yaşlı ata Ceremi Fançer və 21 yaşlı ana Destini Kampos barəsində qətl işi açılıb. Kampos cümə günü, Fançer isə şənbə günü həbs edilərək müxtəlif həbsxanalara göndərilib.

Hadisə 2024-cü ilin may ayında Hyustonda baş verib. Gələn məlumat əsasında otelə gedən polis əməkdaşları, Brookelynn Fançer adlı 4 aylıq körpəni siyirtmənin içində huşsuz vəziyyətdə tapıb. Körpənin hadisə yerində həyatını itirdiyi məlum olub. Məhkəmə-tibb ekspertizasına əsasən, körpə boğularaq öldürülüb.

Araşdırmalar nəticəsində məlum olub ki, Kampos və Fançer körpənin ağlama səsini susdurmaq üçün siyirtməni dəsmallarla döşəyib və onu dəfələrlə oraya qoyublar. Məhkəmədə Kampos körpəni bir neçə dəfə siyirtməyə yerləşdirdiyini etiraf edib. Eyni zamanda məlum olub ki, Kampos hazırda 7 aylıq hamilədir. Ata Fançerin də hadisədə birbaşa məsuliyyət daşıdığı qeyd olunub.

Cütlüyün yaşadığı evdə aparılan araşdırmalarda isə gigiyena şəraitinin olduqca pis olduğu, mətbəx və hamamda suyun belə olmadığı aşkarlanıb.

Nənədən fəryad: "Ədalət yerini tapsın"

Körpənin nənəsi Liza Farrell hadisədən sonra bunları deyib:

"Hər ikisi günahkardır. Nəvəmizin həyatını məhv etdilər. Ədalət yerini tapmalıdır. Nəvəm artıq nə məktəb məzuniyyətini görə biləcək, nə də öz toyunu yaşayacaq… O, artıq heç nə yaşaya bilməyəcək".

Telegramda izləyin