Azərbaycanlı qardaşlar Rusiya vətəndaşlığından məhrum edildi

Gürcüstanda doğulan və etnik azərbaycanlı olan 36 yaşlı Əliyev Sahil Balam oğlu və onun 38 yaşlı qardaşı Elvir vaxtilə Rusiya vətəndaşlığı alıblar.

Lent.az-ın Rusiya KİV-nə istinadla xəbərinə görə, qardaşlar Kaluqa vilayətinin Babınino kəndində uzun müddət gərgin vəziyyət yaradıb.

Bildirilir ki, Əliyevlər müxtəlif ağırlıqdakı cinayətlərə görə dəfələrlə cinayət məsuliyyətinə cəlb ediliblər: döyülmə, sənədlərin saxtalaşdırılması və əcnəbilərin qondarma qeydiyyatı. Üstəlik, qardaşlar Rusiyada qadağan edilmiş "AUE" hərəkatının - kriminal dünya dəyərlərinin gənclər arasında yayılması ideologiyasını qəbul edərək onu yerli gənclər arasında fəal şəkildə təbliğ ediblər.

Bundan başqa, iddialara görə, azərbaycanlı qardaşlar Rusiyada qadağan olunmuş cinayətkar hərəkatları dəstəkləyib, həmçinin azərbaycanlı etnik qrupun üstünlüyü ideyalarını təbliğ edib, gəncləri rusdilli əhaliyə qarşı yönəldiriblər.

Bundan əlavə, daha bir iddiaya görə, Elvir və Sahil yerli əhaliyə qarşı iyrənc münasibətlərini gizlətməyib, aqressiv məqsədlərini və Rusiyada etnik anklavlar yaratdıqlarını açıq şəkildə bəyan ediblər. Onların Ukraynadakı müharibə ilə bağlı rüsvayçı bəyanatları ağılın bütün sərhədlərini aşıb: Əliyevlər rus əsgərlərinin ölümünü dəstəkləyib, onların həlak olan həmvətənlərini ələ salıblar.

Çoxsaylı şikayətlərə və cinayət işlərinə baxmayaraq, qardaşlar uzun müddət ciddi cəzadan yayına biliblər. Guya Əliyevlər onların qanunsuz fəaliyyətlərini işıqlandıran jurnalistlərə qarşı iddialar irəli sürüblər.

Məlumatda qeyd edilir ki, azərbaycanlı qardaşlar məhz bu səbəblərə görə Rusiya vətəndaşlığından məhrum ediliblər.

Hazırda Elvir və Sahil hüquq-mühafizə orqanlarının nəzarətindədir. Onlara müəyyən müddət ərzində Rusiyanı tərk etmək əmri verilib.

Telegramda izləyin