Vida mərasimində göydən pul yağdı - VİDEO

ABŞ-ın Miçiqan ştatının Detroit şəhərində inanılmaz bir hadisə baş verib: göydən yüzlərlə dollar yağdı.

Sonxeber.az xəbər verir ki, şəhərin şərq tərəfində yerləşən Gratiot və Conner küçələrinin kəsişməsində keçirilən bu qeyri-adi vida mərasimi, yerli ictimaiyyət arasında səxavəti ilə tanınan Darrell Tomasın xatirəsinə həsr olunub.

Hadisə 27 iyun tarixində baş verib. 15 iyun günü 58 yaşında vəfat edən Tomas üçün təşkil edilən tədbirdə, onun oğulları atasının xatirəsini yaşatmaq üçün simvolik bir jestə imza atıblar. Ailəyə məxsus avtomobil yuma məntəqəsinin yaxınlığında helikopter vasitəsilə yüzlərlə dollar havadan səpilib.

Şahidlər bildirir ki, qəfil göydən yağmağa başlayan pullar ətrafdakı sakinləri təəccübləndirib, bəzi vətəndaşlar isə əllərində torbalarla pulları toplamağa çalışıblar.

Darrell Tomas məhəllənin sevilən simalarından biri olub. Ailəsinə bağlılığı, qonşuluq münasibətlərinə verdiyi önəm və klassik avtomobillərə olan həvəsi ilə tanınıb.

Onun oğlu Smoke tədbirdə etdiyi çıxışda belə deyib:

"Bəlkə də Detroiti tanıyanlar atamı tanımır, amma o, mükəmməl bir ata idi. Cəmiyyət üçün bir əfsanə idi. Hər kəsə kömək edərdi və bu da onun hər kəs üçün etdiyi son yaxşılıqdır. Başqa heç nə deyil".

Telegramda izləyin