Hamilə olduğunu düşündü, lakin bədxassəli şişlə qarşılaşdı

Cənubi Afrikanın paytaxtında yaşayan 28 yaşlı Tamsyn Gerrits səhər oyandıqda qarnında şişkinlik hiss edib.

Sonxeber.az türk mediasına istinadən xəbər verir ki, güzgüyə baxdıqda özünü təxminən beş aylıq hamilə kimi gördüyünü deyən Gerrits, bunun normal olmadığını anlayaraq dərhal xəstəxanaya müraciət edib.

Aparılan ilkin testlər nəticəsində onun hamilə olmadığı müəyyən olunub. Daha sonra ultrasəs müayinəsinə və əlavə yoxlamalara göndərilən Gerritsin qarnındakı şişkinliyin sidik kisəsinə təzyiq edən maye ilə dolu bir kütlə olduğu ortaya çıxıb. Dəqiq diaqnoz isə günlər sonra keçirilən ginekoloji müayinə zamanı qoyulub: yumurtalıq şişi.

Xəstəlik sürətlə inkişaf edirdi. Cümə günü kütlənin ölçüsü 12 santimetr olduğu halda, yalnız üç gün sonra bu ölçü 17 santimetrə çatıb. Bu səbəblə Gerrits təcili əməliyyata alınıb. Əməliyyat zamanı şiş partlayıb, lakin bu hal xəstəliyin yayılmadan qarşısının alınması baxımından həkimlər tərəfindən bir şans kimi qiymətləndirilib.

Biyopsiya nəticələri şişin bədxassəli və irəliləmiş mərhələdə olduğunu göstərib. Hal-hazırda kimyaterapi müalicəsinə başlayan Gerrits həyat mübarizəsini davam etdirir. O, bu ağır dövrdə həyat yoldaşı Jaco və bir yaşlı oğlu Elanın dəstəyi ilə ayaqda qalmağa çalışır.

"Erkən diaqnoz qoyulduğu üçün minnətdaram," – deyən Gerrits, yaşadıqlarını paylaşaraq digər qadınlarda da maarifləndirmə yaratmaq istədiyini bildirib:
"Əgər bir qadının həyatına toxuna bilirəmsə, yaşadığım bütün çətinliklər buna dəyər."

Telegramda izləyin