Bıçaqlı mübahisə: Polis müdaxilə etdi

Bursa şəhərinin Şehreküstü məhəlləsində İshak B. və Ömərcan D. adlı iki şəxs Zafer Plaza yanında spirtli içki qəbul etdikdən sonra məhəllədə qışqırıb çağıraraq ətrafdakılara narahatlıq yaratmağa başlayıblar.

Sonxeber.az türk mediasına istinadən xəbər verir ki, bu vaxt yoldan keçən başqa bir şəxs ilə mübahisəyə başlayan ikili arasında qısa zamanda dava düşüb.

Hadisə barədə polisə məlumat verildikdən sonra hadisə yerinə polis əməkdaşları göndərilib. Davanı ayırmağa çalışan polisə qarşı İshak B. cibindən çıxardığı bıçaqla hücum edib. Polis əvvəlcə havaya xəbərdarlıq atəşi açıb, lakin İshak B. hələ də təcavüzkar davranışını davam etdirib. Nəticədə o, ayağından vurularaq yerə yıxılıb.

Hadisə yerinə gələn təcili yardım briqadası yaralılara müdaxilə etməkdə çətinlik çəkib. Yaralı vəziyyətdə müqavimət göstərməyə davam edən iki şəxs polis müşayiəti ilə təcili yardım maşınına yerləşdirilərək Çekirge Dövlət Xəstəxanasına aparılıb. Davaya qarışan digər şəxs isə saxlanılıb.

Telegramda izləyin