"Bu gecə öləcəksən" deyərək həyat yoldaşını oxla ağır yaraladı

İngiltərənin Şimal Yorkshire bölgəsində yaşayan 57 yaşlı Stephen Carr həyat yoldaşını ox və bıçaqla yaraladığına görə 20 il müddətinə azadlıqdan məhrum edilib.

Sonxeber.az xəbər verir ki, Carr həyat yoldaşı Lorna ilə mübahisə etdikdən sonra ona "Bu gecə öləcəksən" deyib. Daha sonra əvvəlki yarışmalarda istifadə etdiyi güclü yayla evin içində onu izləməyə başlayıb.

Metal uclu oxlarla həyat yoldaşına hücum etməyə cəhd edən Carr üç ox atıb. Lorna son anda bir qapını bağlayaraq oxların hədəfi olmaqdan qurtulub. Ox qapıya saplanıb. Lorna yayla hücumunu dayandırmaq üçün yay ipini kəsməyə çalışıb. Lakin Carr bu dəfə mətbəxə gedib bıçaq götürüb. Evdə həyat yoldaşını təqib edən kişi Lornanı tutanda üzünə yayı vurub və yenidən "Bu gecə öləcəksən" deyərək onu qorxudub.

Lorna yataq otağına qaçaraq təcili yardım nömrəsi 999-u yığıb. O anda Carr üç ox daha atıb, lakin hədəfi vura bilməyib. Ardınca həyat yoldaşının kürəyinə 6 dəfə bıçaq sancıb. Lorna telefonda operatora "Zəhmət olmasa məni öldürmə, Steve! Ananı da düşün!" deyə yalvarıb.

Evdəki təhlükəsizlik kameraları hücumun bir hissəsini qeydə alıb. Bu kameralar yaşlı anaya qulluq üçün quraşdırılmış sistemin bir hissəsi idi.

Hadisədən sonra Carr bağdakı kiçik evcikdə gizlənməyə çalışsa da, polis tərəfindən orada saxlanılıb. Lorna isə xəstəxanaya yerləşdirilib.

Məhkəmədə Carr həmin gecə heç nə xatırlamadığını, alkoqolun təsiri altında olduğunu iddia edib. Həmçinin həyat yoldaşının onu nəzarətdə saxladığını düşündüyünü deyib.

Lakin məhkəmə hücumun planlı və şüurlu şəkildə həyata keçirildiyi qənaətinə gəlib. Jüri onu "qəsdən adam öldürməyə cəhd" ittihamı ilə günahkar bilib. Hakim hadisəni "dəhşətli, ani və fasiləsiz davam edən hücum" kimi qiymətləndirib.

Carr 17 il həbs və 3 il sınaq müddətinə məhkum edilib. Ümumilikdə 20 il azadlıqdan məhrum ediləcək.

Hadisənin diqqət çəkən tərəfi isə Lornanın bütün yaşananlara baxmayaraq həyat yoldaşından şikayətçi olmaması olub. Məhkəməyə yazdığı məktubda Carrı "şəfqətli və anlayışlı adam" kimi təsvir edib, bunun "təkcə bir dəfə baş verən hadisə" olduğunu və onu bağışladığını qeyd edib.

Telegramda izləyin