Soyuducudan körpə meyiti tapıldı – tükürpədici hadisənin detalları

Türkiyənin paytaxtı Ankarada insanı şoka salan bir hadisə baş verib.

Sonxeber.az xəbər verir ki, təxminən bir ay əvvəl "narkotik vasitələrin ticarəti" ittihamı ilə həbs olunaraq cəzaçəkmə müəssisəsinə göndərilən 31 yaşlı Gözde İ.-nin yaxınları 23 iyun tarixində Etimesqut rayonundakı evində təmizlik apararkən dərin dondurucuda körpə oğlan uşağının meyitini aşkarlayıblar.

Hadisə barədə məlumat verildikdən sonra əraziyə polis və təcili tibbi yardım əməkdaşları cəlb olunub və evdə araşdırma aparılıb. Təxminən 2 aylıq olduğu ehtimal edilən körpənin cəsədi Ankara Məhkəmə-Tibb İdarəsinin morquna təhvil verilib. Cəzaevində olan Gözde İ. ilə körpədən götürülən nümunələr üzərində aparılan DNT analizləri nəticəsində qadının uşağın bioloji anası olduğu təsdiqlənib.

Gözde İ.-nin cəzaevində verdiyi ifadədə evlilikdənkənar münasibətdən hamilə qaldığını, hamiləlik dövründə heç bir xəstəxanaya getmədiyini və bədən quruluşunun kök olduğu üçün hamiləliyinin ailəsi və ətrafdakılar tərəfindən fərq edilmədiyini bildirib. 2024-cü ilin iyun ayında evdə tək olduğu zaman doğumun başladığını, öz gücü ilə uşağı dünyaya gətirdiyini və doğuş zamanı çox qan itirdiyini deyib.

İfadəsinə davam edən Gözde İ., doğuşdan sonra körpə ilə birlikdə salondakı divana keçdiyini, onu əmizdirərkən yuxuya getdiyini və təxminən 7-8 saat sonra ayıldığında körpənin göyərmiş və nəfəs almadığını görərək şoka düşdüyünü qeyd edib. O, körpənin ölüm səbəbinin yuxu zamanı bilmədən onun üstünə yatması ola biləcəyini irəli sürüb.

Gözde İ. əlavə edib ki, evdəki soyuducunun sıradan çıxmasından sonra yenisi alınıb və əşyalar yeni soyuducuya köçürülərkən birlikdə yaşadığı ev yoldaşı körpənin meyitini görüb. O, vəziyyəti ev yoldaşına izah etdiyini və heç kimə deməməsini istədiyini, ev yoldaşının isə buna razı olub, normal həyatlarına davam etdiklərini bildirib. Gözde İ., körpənin atası olduğunu iddia etdiyi A. adlı şəxsin də hadisədən xəbərdar olduğunu deyib. Lakin həm ev yoldaşı, həm də A. bu iddiaları təkzib ediblər.

Hadisə ilə bağlı istintaq davam edir.

Telegramda izləyin