Ölən şəxsin vəsiyyəti təəccübləndirdi – dəfn mərasimində helikopterdən pul səpildi

Amerikanın Detroit şəhərində baş verən dəfn mərasimi iştirakçılar üçün gözlənilməz bir hadisəyə çevrilib.

Sonxeber.az xəbər verir ki, 58 yaşında Alzheimer xəstəliyindən vəfat edən Darrell Thomas adlı şəxsin son arzusu, dəfninə qatılan insanlara göydən pul səpilməsi olub. Ailəsi də bu vəsiyyəti yerinə yetirib.

Mərasim zamanı bir helikopter təxminən 5 min dollar (təxminən 160 min türk lirəsi) və gül ləçəklərini mərasim iştirakçılarının üzərinə səpib. Havada uçuşan yüzlərlə dollar əskinasları insanların həm marağına səbəb olub, həm də duyğusal anlar yaşadıb. Görüntülərdə bir uşağın "Mən də o pullardan istəyirəm!" deyə qışqırdığı, digərlərinin isə əskinasları tutmaq üçün həyəcanla hərəkət etdiyi eşidilir. Bəziləri isə sadəcə bu qeyri-adi anı seyr etməklə kifayətlənib.

Mərasim, Darrell Thomasın sahibi olduğu avtomobil təmiri sexinin yerləşdiyi East Detroit bölgəsində keçirilib. Həmin an təsadüfən yoldan keçən sürücülər belə avtomobillərini saxlayaraq "pul yağışına" qoşulublar.

Polis əməkdaşları yalnız gül ləçəklərinin səpiləcəyindən xəbərdar olduqlarını, pulun atılacağından xəbərlərinin olmadığını bildiriblər. Lakin hadisə zamanı heç bir insident qeydə alınmayıb.

Telegramda izləyin