Meşə yanğını faciəyə səbəb oldu: 2 nəfər avtomobildə yanaraq öldü, lüks villalar külə döndü

Kipr Respublikasının cənubunda, Limassol şəhəri yaxınlığında baş verən güclü meşə yanğını sürətlə yayılaraq bir çox yaşayış məntəqəsini təhlükə altına alıb. İlkin məlumatlara görə, yanğından qaçmağa çalışan iki nəfər avtomobildə yanaraq həyatını itirib. Bölgədə yerləşən bir sıra lüks villalar isə tamamilə yanaraq külə dönüb.

Sonxeber.az xarici mediaya istinadən xəbər verir ki, yanğın ç qısa müddət ərzində təxminən 100 kvadratkilometrlik ərazini əhatə edib. Xüsusilə şərab istehsalı və turizm ilə tanınan bölgələrdə ciddi dağıntılar baş verib. Yerli hakimiyyət orqanları tərəfindən kütləvi təxliyələrə start verilib.

Yanğının söndürülməsi üçün yerüstü və hava qüvvələri səfərbər edilib. Lakin gecə hava qaranlıqlaşdığı üçün təyyarələrin fəaliyyəti müvəqqəti olaraq dayandırılıb. Hadisə nəticəsində 10 nəfər xəsarət alıb, onlardan ikisinin vəziyyəti ağırdır. Eyni zamanda itkin düşənlərin də olduğu bildirilir.

Yüksək temperatur yanğının yayılmasını daha da sürətləndirir. Havanın 45 dərəcəyə qədər yüksələcəyi proqnozlaşdırılır ki, bu da ilin ən isti günü ola bilər. Səhər saatlarında Limassol səması qırmızı rəngə bürünüb.

Yanğının dəqiq səbəbi hələ müəyyən olunmayıb, lakin güclü küləklərin alovun yayılmasında mühüm rol oynadığı qeyd olunur.

Kipr hökuməti Avropa İttifaqından yardım istəyib. İspaniyanın iki yanğınsöndürən təyyarə göndərəcəyi, İordaniyanın da dəstək göstərəcəyi açıqlanıb.

Qeyd edək ki, ölkə hazırda ciddi quraqlıqla üz-üzədir. Yanğın bölgəsinə yaxın yerləşən Kouris su anbarında suyun doluluq səviyyəsi cəmi 15,5 faiz təşkil edir.

Telegramda izləyin