4 yaşlı Leyla Aydəmirin ölümü ilə bağlı işdə yeni qərar: 7 nəfərin bəraəti ləğv edildi

Ağrıda 2018-ci ildə itkin düşdükdən bir neçə gün sonra cansız bədəni tapılan 4 yaşlı Leyla Aydəmirin ölümü ilə bağlı işdə yeni bir inkişaf yaşanıb.

Sonxeber.az türk mediasına istinadən xəbər verir ki, Yargıtay 1-ci Cinayət Dairəsi, 7 nəfər haqqında verilmiş bəraət qərarını natamam araşdırma aparıldığı əsas gətirilərək ləğv edib.

Qeyd edək ki, Ağrı 1-ci Ağır Cəza Məhkəməsi, 2021-ci ildə təqsirləndirilən Ayşə A., Besim D., Hatun D., Mehmet Ali A., Musa A., Yıldırım A. və Yusuf A.-nın "xüsusi amansızlıqla adam öldürmə" və "şəxsi azadlıqdan məhrum etmə" ittihamlarından bəraətinə qərar vermişdi. Daha sonra işə baxan Erzurum Bölge Apellyasiya Məhkəməsi 1-ci Cinayət Dairəsi, prokuror və zərərçəkmiş tərəfin vəkillərinin müraciətlərini rədd edərək bəraət qərarlarını qüvvədə saxlamışdı.

Ancaq Yargıtay həmin qərarı ləğv edib. Qərarda qeyd olunub ki, hadisənin baş verdiyi dövrdə sosial mediada edilən bir paylaşımın kim tərəfindən edildiyi araşdırılmayıb. Bundan əlavə, istintaq materiallarında yer alan bir CD görüntüsündəki şəxslərin müəyyənləşdirilməsi və ifadələrinin alınması da təmin olunmayıb.

Yargıtay bu çatışmazlıqların aradan qaldırılaraq işin yenidən araşdırılmalı olduğunu bildirib. Dosye yenidən qiymətləndirilmək üçün Ağrı 1-ci Ağır Cəza Məhkəməsinə göndərilib.

Telegramda izləyin