Gəmidə bir gəncin ölümünə səbəb olan dava ilə bağlı tutulan şübhəlilər ifadə verib

Muğlanın Marmaris rayonunda gəmidə baş verən dava nəticəsində 22 yaşlı Arda Deniz Onat həyatını itirib.

Sonxeber.az türk mediasına istinadən xəbər verir ki, hadisə ilə əlaqədar tutulan üç nəfərin ifadələri ortaya çıxıb.

Hadisədən sonra qaçmağa çalışarkən Arda Deniz Onatın yaxınları tərəfindən qarşısı alınan və sonradan həbs edilən Sinan Yetkin, Selim Yetkin və Coşkun Volkan Canfedai verdikləri ifadələrdə davanı qarşı tərəfin başlatdığını və gəncin ölümü ilə bir əlaqələrinin olmadığını bildiriblər. Hər üç şəxs qarşı tərəfdən şikayətçi olduqlarını deyiblər.

Şübhəlilərdən Coşkun Volkan Canfedai ifadəsində dostlarının dəvəti ilə tətildə olduğunu və gəmiyə getdiyini bildirib. O, gəminin sahibi ilə aralarında mübahisə yaşandığını və sonra onlara qayıq avarı ilə hücum edildiyini deyib:

"Ardanı heç vurmadım, onu döymədim. Özümü qorumağa çalışdım. Ardanın ölümü ilə heç bir əlaqəm yoxdur. Məni döyən kapitan və digərləri haqqında şikayətçiyəm."

Şübhəlilərdən Sinan Yetkin isə gəmidən ayrıldıqdan sonra Arda və atasının onları izlədiyini deyib:

"Arda və atası bizdən sonra gəmiyə minərək bizə hücum etdilər. Atası qabırğama vurdu. Mən Ardanı boğmağa çalışmamışam, sadəcə üzünə zərbə vurduğumu xatırlayıram. Ardanın nə vaxt suya düşdüyünü görmədim."

Selim Yetkin isə "Mənə qarşı irəli sürülən ittihamı qəbul etmirəm və gəminin heyətindən, eləcə də Ardanın atasından şikayətçiyəm" - deyə bildirib.

Qeyd edək ki, 20 iyul tarixində Marmaris dənizində gəmidə baş verən dava nəticəsində 22 yaşlı Arda Deniz Onat həyatını itirmişdi. Gənc ertəsi gün Bozburun məhəlləsində dəfn olunub. Onatın yaxınlarının sabah şübhəlilərin verdikləri ifadələrə etiraz edəcəyi və ədalətin təmin olunması üçün yürüş təşkil edəcəyi bildirilir.

Telegramda izləyin