Ağır yol qəzasında eyni ailədən 3 nəfər həyatını itirib

Türkiyənin Bursa vilayətinin Karacabey rayonunda avtomobil ilə yük maşınının toqquşması nəticəsində eyni ailədən 3 nəfər həyatını itirib, 5 yaşlı uşaq isə yaralanıb.

Sonxeber.az türk mediasına istinadən xəbər verir ki, ailə övladları Süleyman Kahyaoğlunun Kara Harp Məktəbinə müraciəti üçün Bursa şəhərində tibbi müayinədən keçdikdən sonra geri dönərkən qəzaya uğrayıb.

Fəlakətli qəza Karacabey–Mustafakemalpaşa yolu üzərindəki karton qutusu fabrikinin qarşısında baş verib. İddialara görə, Karacabey istiqamətindən Mustafakemalpaşa istiqamətinə hərəkətdə olan, 52 yaşlı Süleyman Kahyaoğlunun idarə etdiyi 16 SK 645 dövlət nömrə nişanlı avtomobil, tali yoldan ana yola çıxan Ramazan Çetinkayanın idarə etdiyi 16 ALZ 236 nömrəli yük maşını ilə toqquşub.

Toqquşma nəticəsində avtomobil tamamilə yararsız hala düşüb. Hadisə yerinə dərhal polis, təcili tibbi yardım və yanğınsöndürmə xidmətləri cəlb olunub. Sağlamlıq işçilərinin keçirdiyi ilkin müayinəyə əsasən avtomobildə olan ailə üzvlərindən Şükrü Kahyaoğlu, həyat yoldaşı Fatma Kahyaoğlu (45) və onların 19 yaşlı oğlu Süleyman Kahyaoğlu həyatını itirib. Ailənin digər övladı – 5 yaşlı Alaattin Kahyaoğlu isə müxtəlif dərəcəli bədən xəsarətləri alıb.

Yaralı uşaq Karacabey Dövlət Xəstəxanasına yerləşdirilib. Hadisə nəticəsində həlak olan ailə üzvlərinin meyitləri isə müvafiq araşdırmalardan sonra həmin xəstəxananın morquna təhvil verilib.

Məlumata görə, həyatını itirən ata Şükrü Kahyaoğlu bölgə yol polisi idarəsində polis zabiti kimi fəaliyyət göstərirmiş.

Hadisə ilə bağlı araşdırma aparılır.

Telegramda izləyin