Mağazadan mebel alan cütlük aldadıldı: "Yeni" deyə aldıqları divan köhnə çıxdı - VİDEO

İstanbulda yaşayan evli bir cütlük, evlərini yeniləmək məqsədilə getdikləri mebel mağazasından "təzə" məhsul olaraq təqdim edilən divan dəsti alıb. Ancaq daşınma zamanı baş verən bir hadisə nəticəsində divanın parçasının cırılması, cütlüyü şoka salıb. Cırıq parçanın altından köhnə döşəmə və istifadə izləri çıxıb – beləliklə də mebelin əslində ikinci əl olduğu üzə çıxıb.

Sonxeber.az türk mediasına istinadən xəbər verir ki, hadisə ötən həftə baş verib. Cütlük, evlərinin salonunu yeniləmək üçün getdikləri mağazadan yeni divan dəsti alıb. Lakin mebel evə daşınarkən baş verən kiçik bir qəza zamanı parça cırılıb. Altından çıxan köhnə döşəmə, əvvəlki deformasiya izləri və ləkələr isə divanın əvvəllər istifadə olunduğunu və sadəcə üzərinə yeni parça çəkilərək "yeni" kimi satıldığını ortaya qoyub.

"Açıq-aşkar aldadıldıq"

Hadisədən sonra dərindən sarsılan cütlük dərhal mağaza ilə əlaqə saxlayıb. Lakin aldıqları cavablar onları qane etməyib. Onlar bildiriblər ki, məhsulun qəbzində "yeni" ifadəsi yer alır və bu səbəbdən heç bir şübhə ilə alış etməyiblər:

"Bizə yeni məhsuldur dedilər. Ona görə rahatlıqla aldıq. Amma illərlə başqasının oturduğu divanı bizə təzə adı ilə satıblar. Açıq-aşkar aldadıldıq", – deyə cütlük bildirib.

Onlar məsələ ilə bağlı hüquqi addım atmaq üçün yaxın günlərdə prokurorluğa şikayət edəcəklərini açıqlayıblar.

Telegramda izləyin