Dənizdə sahilə vurmuş kişi meyiti tapıldı

Antalyanın Konyaaltı sahilində kişi meyiti tapılıb. Cəsədin üzərindəki dərin kəsiklər onun Aşağı Düden şəlaləsindən yıxıldığı ehtimalını gücləndirir. Həmin şəxs dünən axşam saatlarında şəlalədən düşmüş və axtarışlara baxmayaraq tapılmamışdı.

Sonxeber.az türk mediasına istinadən xəbər verir ki, hadisə bu gün səhər saatlarında qeydə alınıb. Sahildə istirahət edən bir vətəndaş suyun yaxınlığında hərəkətsiz yatan şəxsi görərək, dərhal cankurtaranlara məlumat verib.

Cəsədin kimliyi müəyyən olunmayıb

Əraziyə dərhal təcili tibbi yardım, Sahil Mühafizəsi, Cinayət Axtarış Şöbəsi və polis əməkdaşları cəlb olunub. Təcili tibbi yardım əməkdaşlarının yoxlamasından sonra məlum olub ki, həmin şəxs artıq dünyasını dəyişib.

Hadisə yerinə gələn prokurorun ilkin araşdırmasından sonra polis ekspertiza qrupu sahildə araşdırma aparıb. Təxminən 50 yaşlarında olan şəxsin üzərindən heç bir sənəd tapılmayıb. Cəsəd otopsiya üçün Antalya Məhkəmə Tibbi Ekspertiza Məntəqəsinin morquna təhvil verilib.

"Günəşlənir sandım, amma cansız idi"

Hadisənin şahidi Yusuf Pekyeğen baş verənləri belə izah edib:
"Burada dənizə girmək istəyirdim. Sudan birinin üzdə olduğunu gördüm, əvvəl günəşlənir zənn etdim. Amma cansız idi. Çıxarmağa çalışdım, gücüm çatmadı. Cankurtaranlara xəbər verdim. Onlar müdaxilə etdilər, amma bədəni şişmişdi və dayanmadan qan axırdı. Qorxduq."

Dərin kəsik izləri aşkarlandı

Cəsədin baş və bədən nahiyəsində dərin kəsik izləri olduğu müəyyən olunub. İlkin ehtimallara görə, cəsəd dünən axşam saatlarında Aşağı Düden Şəlaləsindən yıxılaraq axınla sahilə qədər sürüklənib. Meyitin kimliyi və ölüm səbəbi aparılacaq otopsiyadan sonra dəqiqləşəcək.

Telegramda izləyin