Tarlada başından güllələnmiş qadının qətli ilə bağlı şübhəli saxlanıldı

Edirnənin Havsa rayonunda tarlada başından güllələnmiş halda tapılan 29 yaşlı Semra Çelikin qətlində şübhəli bilinən Zeki Doğan Osmaniyə şəhərində saxlanılıb.

Sonxeber.az türk mediasına istinadən xəbər verir ki, hər ikisi evli və uşaqlı olan şəxslər bir müddətdir münasibət yaşayırmış. Semra Çelikin "Uşaqlarımı tərk edə bilmərəm, geri dönmək istəyirəm" deməsi üzərinə tərəflər arasında mübahisə yaranıb və Doğan onu öldürüb.

Edirnənin Havsa rayonuna bağlı Kabaağaç kəndində tarlada qadın meyiti aşkar edilib. Ərazidə işləyən kəndlilər sahədə hərəkətsiz yatan qadını görərək dərhal polisə və təcili tibbi yardıma məlumat veriblər. Hadisə yerinə gələn qruplar qadının 29 yaşlı Semra Çelik olduğunu və başından odlu silahla vurularaq qətlə yetirildiyini müəyyən ediblər.

Polis şübhəlini təhlükəsizlik kameraları vasitəsilə tapdı

Edirne İl Jandarma Komandanlığına bağlı JASAT qrupları hadisə ilə bağlı genişmiqyaslı araşdırma aparıb. Ərazidəki təhlükəsizlik kameraları, telefon danışıqları və Çelikin ətraf mühitlə əlaqələri incələnib. Araşdırmalar nəticəsində qadının son olaraq 33 yaşlı Zeki Doğan ilə görüşdüyü məlum olub.

Qatil Osmaniyədə gizlənirmiş

Araşdırma zamanı Doğanın cinayətdən sonra Osmaniyəyə qaçdığı müəyyən edilib. Hüquq-mühafizə orqanlarının keçirdiyi əməliyyatla Doğan gizləndiyi evdə saxlanılıb. Edirnəyə gətirilən şübhəli istintaq zamanı Semra Çeliki öldürdüyünü etiraf edib. Məhkəməyə çıxarılan Doğan, hakim qərarı ilə həbs olunaraq cəzaçəkmə müəssisəsinə göndərilib. Hadisə ilə bağlı istintaq davam etdirilir.

Keçmiş münasibətlər faciəyə səbəb oldu

Sabah qəzetinin yaydığı məlumata görə, Semra Çelik və Zeki Doğan 2021-ci ildə Şanlıurfada tarlada işləyərkən tanış olublar. Hər ikisinin də ailəli və üç uşaq sahibi olduğu bildirilir. Zamanla aralarında duyğusal münasibət yaranıb. Daha sonra birlikdə Edirnəyə gedərək bir neçə gün oteldə qalıblar. Lakin Semra Çelik "Uşaqlarımı buraxa bilmərəm, geri dönmək istəyirəm" dedikdə, Doğan "Mən hər şeyi buraxıb gəlmişəm" deyərək əsəbiləşib. Aralarında yaşanan mübahisədən sonra Zeki Doğanın qadını silahla başından vuraraq tarlaya atdığı müəyyən olunub.

Telegramda izləyin