İcra başçısının adından istifadə edərək türkiyəli iş adamını aldatdı - HƏBS OLUNDU

Bakıda türkiyəli iş adamına qarşı dələduzluq edilib.

Oxu.Az-ın məlumatına görə, hadisə paytaxtın Sabunçu rayonu ərazisində baş verib.

Belə ki, 1992-ci ildən Bakıda yaşayan türkiyəli iş adamı Mehmet Okumuş (ad şərtidir) paytaxt ərazisində biznesini genişləndirmək üçün torpaq sahəsi almaq qərarına gəlib. O, bu məqsədlə ləğv edilmiş Milli Həmrəylik Partiyasının sədri Əlisahib Hüseynovla məsləhətləşib. Ə.Hüseynov isə Sabunçu rayonunda maklerliklə məşğul olan Elşad Ağayevlə (soyad şərtidir) bu barədə danışıb. Elşad bildirib ki, Sabunçu rayon icra başçısı Adil Vəliyevin Abşeron rayonu, Məmmədli kəndində torpaq sahəsi var və həmin torpaq sahəsini 3.5 milyon manata satır. Əlisahib bu barədə türkiyəli iş adamına məlumat verib. İş adamı isə həmin torpaq sahəsini 2 milyon 700 min manata ala biləcəyini deyib. Elşad bu barədə razılaşıb və türkiyəli iş adamından 50 min dollar, yəni 85 min manat beh alıb.

Hadisədən bir müddət keçməsinə baxmayaraq, Elşad iş adamına torpaq sahəsinin sənədlərini təqdim etməyib və vaxt uzatmağa başlayıb. O, müxtəlif bəhanələrlə prosesi uzatmaqla vaxt qazanmaq istəyib. Elşad bu məqsədlə bir neçə dəfə zərərçəkmiş şəxs və onun nümayəndələri ilə Sabunçu Rayon İcra Hakimiyyəti qarşısında görüşərək, guya icra başçısı və onun müavini ilə görüşdüyünü, prosesin yaxın günlərdə reallaşacağına söz verib.

Çarəsiz qalan iş adamı məsələ ilə bağlı polisə müraciət edib. Araşdırmalarla məlum olub ki, Elşad heç bir torpaq sahəsi ilə bağlı heç kimlə danışıqlar aparmayıb və iş adamına qarşı dələduzluq edib.

Faktla bağlı cinayət işi başlanılıb və iş Bakı Ağır Cinayətlər Məhkəməsinə göndərilib. Məhkəmənin hökmü ilə E.Ağayev 6 il 6 ay azadlıqdan məhrum edilib.

Telegramda izləyin