Səudiyyə Ərəbistanında lunaparkda faciəvi qəza: 23 nəfər yaralandı - VİDEO

Səudiyyə Ərəbistanının Taif şəhərinə bağlı Hada bölgəsində yerləşən Green Mountain Park əyləncə mərkəzində ağır qəza baş verib.

Sonxeber.az türk mediasına istinadən xəbər verir ki, parkda attraksionlardan birində texniki nasazlıq baş verb. Nəticədə içərisində gənclərin olduğu kabin havada iki hissəyə ayrılıb və güclü zərbə ilə yerə çırpılıb.

Khaleej Times və Okaz kimi yerli media orqanlarının məlumatına görə, hadisə anı ziyarətçilərin mobil telefon kameraları tərəfindən qeydə alınıb. Kadrlarda attraksionun mərkəzi dayağının qəfil qırıldığı və sərnişinləri daşıyan qolun sürətlə yerə düşdüyü əks olunub. Qəza zamanı ərazidə böyük panika yaşanıb, ziyarətçilərin kömək çağırışları ətrafda əks-səda doğurub.

Hadisə yerinə dərhal təcili tibbi yardım və xilasedici qruplar cəlb olunub. İlkin məlumata görə, azı 23 nəfər müxtəlif dərəcəli xəsarətlər alıb, onlardan bəzilərinin vəziyyəti ağırdır. Yaralılar yaxınlıqdakı xəstəxanalara yerləşdirilərək müalicəyə götürülüblər.

Rəsmi qurumlar qəzaya səbəb olan amillərin müəyyən edilməsi üçün genişmiqyaslı istintaq başladıldığını açıqlayıb. Attraksionda texniki nasazlıq və ya lazımi baxımın aparılmaması ehtimalları araşdırılır. Green Mountain Park rəhbərliyi hadisə ilə bağlı hələlik rəsmi açıqlama verməyib.

Qəzadan sonra ölkədə lunaparklarda təhlükəsizlik məsələləri yenidən gündəmə gəlib. Yay aylarında artan ziyarətçi axını səbəbindən əyləncə mərkəzlərində texniki yoxlamaların və nəzarətin gücləndirilməsi ilə bağlı çağırışlar səsləndirilir.

Telegramda izləyin