İş yerlərini güllələyərək hədə-qorxu gələn 2 şübhəli həbs olunub

İstanbulun Ümraniye və Ataşəhər rayonlarında iş yerlərinə silahlı hücum edərək hədə-qorxu yolu ilə pul almağa çalışdıqları iddia edilən iki nəfər polis tərəfindən saxlanılıb.

Sonxeber.az türk mediasına istinadən xəbər verir ki, onlardan birinin sosial mediada "İşıqları söndürdüm, məni tapmaq istəyən yandırsın" paylaşımı etdiyi, yaxalandığı anda isə polisə "Məni necə tapdınız?" dediyi məlum olub. Şübhəlilərin hər ikisinin çoxsaylı cinayət qeydi olduğu və məhkəmə qərarı ilə həbsxanaya göndərildiyi bildirilib.

Hadisə 16 iyul saat 02:00 radələrində Ümraniyənin Tatlısu məhəlləsi, Göksu küçəsində baş verib. Hədə-qorxuya boyun əyməyən iş yerinə silahlı basqın edən şübhəlilərdən biri atəş açıb, digəri isə həmin anları telefonla çəkib. Atəş nəticəsində iş yerinin pəncərələrinə və qarşıda dayanan avtomobilə ümumilikdə 11 güllə dəyib. Hadisədən sonra şübhəlilər qaçıb.

İstanbul Polisi Gasp Büro əməkdaşlarının apardığı istintaq zamanı hücum anının təhlükəsizlik kameraları tərəfindən qeydə alındığı müəyyən edilib. Araşdırmalar nəticəsində şübhəlilərin əvvəlcə Avropa tərəfində gizləndiyi, daha sonra Anadolu tərəfinə qayıtdığı müəyyən olunub. Keçirilən əməliyyatla onların hər ikisi saxlanılıb.

Polis idarəsinə gətirilən şübhəlilər kimliklərinin itirildiyini deyərək yalan məlumat veriblər. Lakin ifadələrindəki ziddiyyətlərdən sonra saxta adlar istifadə etdikləri üzə çıxıb. S.Ö. kimi tanıtdığı şəxsin əslində B.K. (22) olduğu, onun 12 cinayət qeydiyyatının olduğu, 8 ayrı iş üzrə axtarıldığı və ümumilikdə 12 il 8 ay 20 gün həbs cəzası olduğu aşkar edilib. Digər şübhəlinin isə F.K.Ö. olduğu və onun da 5 cinayət qeydiyyatının olduğu məlum olub.

Polisin araşdırmaları zamanı F.K.Ö.-nün sosial şəbəkədə əlində silahla çəkilmiş fotolar paylaşdığı, həmin şəkillərdən birinin üzərində "İşıqları söndürdüm, məni tapmaq istəyən yandırsın" yazıldığı müəyyən edilib. Onun saxlanıldığında isə ilk sözlərinin "Məni necə tapdınız?" olduğu öyrənilib.

Bundan əlavə, istintaq zamanı müəyyən olunub ki, şübhəlilər 2 iyun 2025-ci ildə Ataşəhərin Ferhatpaşa məhəlləsində yerləşən bir iş yerinə də hədə-qorxu məqsədilə atəş açıblar. Bu hücum zamanı iş yerinə 4 güllə dəydiyi və həmin iş üzrə daha əvvəl S.M.S. (18) adlı şəxsin həbs olunduğu məlum olub.

Gasp Büroda prosesi tamamlanan B.K. və F.K.Ö. məhkəmənin qərarı ilə həbs edilərək cəzaçəkmə müəssisəsinə göndərilib.

Telegramda izləyin