Dövlət Xəstəxanasında tavan çökdü – 2017-ci ildən bəri çökmə xəbərdarlığı var idi

Türkiyənin Denizli şəhərində yerləşən və 2017-ci ildə hazırlanmış rəsmi hesabatlarda binanın 90 faizinin çürük, zəlzələyə dayanıqsız olduğu bildirilən Denizli Dövlət Xəstəxanasında tavan çöküb.

Sonxeber.az türk mediasına istinadən xəbər verir ki, hadisə Balıkesirin Sındırgı rayonunda baş verən 6,1 bal gücündə zəlzələdən cəmi bir gün sonra qeydə alınıb.

8 blokdan ibarət xəstəxana ilə bağlı 2017-ci ildə hazırlanmış texniki hesabatda binanın dayanıqsız olduğu, binanın gilli qum üzərində inşa edildiyi və 4 metr dərinlikdə suya rastlandığı qeyd edilmişdi.

Tavanın əməliyyat otağının qarşısında çökdüyünü bildirən Hekim Birliyi Sendikası, bunun illərlə davam edən laqeydliyin nəticəsi olduğunu vurğulayıb:

"2017-ci il rəsmi hesabatlarında binanın 90 faizinin çürük olduğu və binanın zəlzələyə dayanıqsız olduğu açıq şəkildə müəyyən edilib. Bütün müraciətlərimizə baxmayaraq heç bir addım atılmayıb. Denizli 1-ci dərəcə zəlzələ bölgəsidir. Hər gün minlərlə xəstə, yaxınları və tibb işçiləri bu riskli binada qalmağa məcbur edilir. Can bu qədər ucuzdumu? Bu məsələ ertələnə bilməz."

Genel Sağlık-İş Sendikasının Denizli şöbəsi hadisədə xəsarət və itki olmadığını bildirərək, "Bir daha səslənirik: Bu xəstəxana dərhal təxliyə edilməlidir" çağırışı edib.

HEP-SEN (Tibb Bacıları və Bütün Sağlıq Peşəkarları Həmkarlar İttifaqı) isə əvvəlki illərdə dəfələrlə edilən xəbərdarlıqların nəzərə alınmadığını xatırladıb:

"Denizli Dövlət Xəstəxanasının zəlzələyə dayanıqsız olduğunu dəfələrlə bildirdik, tədbir görülmədi! Etiraz aksiyaları keçirdik, sosial mediada kampaniyalar apardıq, amma səsimiz eşidilmədi. İndi isə 1-ci mərtəbənin tavanı çökdü. Şükür ki, o anda heç kim yox idi. Amma hər gün həm vətəndaşlar, həm də tibb işçiləri ölüm riski ilə üz-üzə qalır. Bu xəstəxananın təxliyəsi üçün mütləq can itkisi mi yaşanmalıdır?"

Həmkarlar ittifaqları, açıqlamalarında Denizli Valiliyi və Türkiyə Səhiyyə Nazirliyinə müraciət edərək xəstəxananın dərhal təxliyəsini tələb ediblər.

Telegramda izləyin