Ukraynanın cənubunda dənizdə mina partladı – 3 nəfər həyatını itirdi

Ukraynanın cənubunda, Qara dəniz sahilində yerləşən məşhur istirahət məkanları Zatoka və Karolino-Buhazda dəhşətli hadisə baş verib.

Sonxeber.az türk mediasına istinadən xəbər verir ki, dənizə sürüklənən minanın partlaması nəticəsində üç nəfər həyatını itirib.

Hadisə bazar günü saat 11:30 radələrində qeydə alınıb. Hadisə şahidlərinin sözlərinə görə, partlayış zamanı dənizdə yüzlərlə istirahətçi var idi. Kənardan gələn iki partlayıcı maddə sahildən təxminən 50 metr məsafədə ardıcıl olaraq partlayıb. Partlayışın gücü dənizdə olan insanlar arasında böyük panika yaradıb və bir çoxu sahilə qaçıb.

Qurbanlardan biri Karolino-Buhaz sahilində, digər iki nəfər isə Zatoka sahilində həyatını itirib. Rəsmilər bu bölgələrdə üzməyin müharibə səbəbindən dənizə sürüklənən minalar üzündən qadağan edildiyini xatırladıb. Buna baxmayaraq, bəzi istirahətçilər qaydaya əməl etməyiblər.

Partlayışdan dərhal sonra mina zərərsizləşdirmə qrupları, sahil mühafizəsi və xilasetmə dəstələri əraziyə gələrək axtarış işlərinə başlayıb. Plajlarda yeni mina olub-olmadığı araşdırılır. Odesa vilayətinin qubernatoru Oleh Kiper açıqlamasında bildirib:

Hadisə Ukrayna Cinayət Məcəlləsinə əsasən "qəza" kimi araşdırılır. Rəsmilər, Odesa bölgəsində yalnız iki çimərliyin üzgüçülük üçün təhlükəsiz olduğunu vurğulayıb: Çornomorsk şəhər mərkəzi çimərliyi və İzmail bölgəsindəki Primorske çimərliyi.

Bu faciə, cəmi iki ay əvvəl eyni bölgədə iki nəfərin mina partlayışı nəticəsində ölməsindən sonra baş verib. Mütəxəssislər xəbərdarlıq edirlər ki, Rusiya–Ukrayna müharibəsi səbəbindən Qara dəniz getdikcə təhlükəli bir mina sahəsinə çevrilir.

Telegramda izləyin