Kolombiyada ənənəvi buğa festivalında faciə: Matador həyatını itirdi

Kolumbiyanın Fundación qəsəbəsində keçirilən ənənəvi corraleja buğa döyüşü festivalında dəhşətli hadisə baş verib.

Sonxeber.az xarici mediaya istinadən xəbər verir ki, 35 yaşlı matador Yovanis Markes buğanın hücumuna məruz qalaraq həyatını itirib.

Hadisə zamanı Markes boğaya tərəf qaçaraq onun üzərindən atlamağa cəhd edib. Lakin uğursuz olan bu hərəkətindən sonra buğa onu buynuzları ilə dəfələrlə vurub. Arenada olan tamaşaçılar qorxu və şok içində çığıraraq hadisəni izləyiblər.

Görüntülərdə matadorun çətinliklə ayağa qalxdığı və tamaşaçıların köməyi ilə arenadan çıxarıldığı əks olunur. Lakin qısa müddət sonra o, həddindən artıq qan itirdiyi üçün yerə yıxılıb. Təcili tibbi yardım maşını ilə xəstəxanaya çatdırılan Markes həkimlərin bütün müdaxilələrinə baxmayaraq vəfat edib.

Heyvan haqları təşkilatı Plataforma ALTO, buğanın hücumunun özünü müdafiə məqsədilə baş verdiyini bəyan edib və hadisənin görüntülərini sosial mediada paylaşaraq diqqətə çatdırıb.

Kolumbiyanın bəzi bölgələrində ənənəvi olaraq keçirilən corraleja tədbirləri uzun illərdir həm insanlar, həm də heyvanlar üçün təhlükəli olması səbəbilə tənqid olunur. Ötən il parlamentdə buğa döyüşlərinin qadağan edilməsi haqqında qanun qəbul edilsə də, bu qadağa yalnız 2027-ci ildən tam qüvvəyə minəcək.

Bu faciəvi hadisə bir daha göstərir ki, belə tədbirlər həm heyvan hüquqları, həm də ictimai təhlükəsizlik baxımından ciddi risk daşıyır.

Telegramda izləyin