Avstraliyada məsciddən azan oxunması planı mübahisə yaratdı

Avstraliyanın ən böyük məscidi olan Lakemba Məscidində cümə namazı üçün səsgücləndiricilərdən azan oxunması ilə bağlı edilən müraciət ölkədə böyük müzakirələrə səbəb olub.

Sonxeber.az türk mediasına istinadən xəbər verir ki, yerli sakinlərin kəskin etirazı nəticəsində layihənin yenidən nəzərdən keçiriləcəyi bildirilib. Lübnanlı Müsəlmanlar Dərnəyinin nümayəndələri isə "Kilsələrdə zənglər çalınır, problem olmur, amma azan təhdid kimi qəbul edilir" deyə etirazlarını ifadə ediblər.

Sidney şəhərində yerləşən Lakemba Məscidi ilə bağlı yeni plan yerli əhali ilə məscid icmasını qarşı-qarşıya gətirib. Lübnanlı Müsəlmanlar Dərnəyi, məscidə dörd ədəd səsgücləndirici quraşdıraraq yalnız cümə günləri azan və namaz yayımı etmək üçün müraciət edib. 14 min 744 avstraliya dolları (təxminən 600 min manat) dəyərində olan bu layihəyə Canterbury Bələdiyyə Şurası qarşı çıxıb.

Bələdiyyə, layihənin rədd edilməsinə dair verdiyi tövsiyədə "səs-küy hesabatındakı uyğunsuzluqlar, binanın hündürlük limitinin aşılması, ətraf mülklərin dəyərinə mənfi təsir göstərməsi və dini həssasiyyətlər" kimi səbəbləri göstərib. Hesabatda, səsgücləndirici quraşdırılması layihəsinin "ətraf sakinlərinin rahatlığına və həyat keyfiyyətinə uzunmüddətli mənfi təsir göstərə biləcəyi" vurğulanıb. Məlumata görə, layihə ilə bağlı rəy soruşulan 329 nəfərdən 328-i buna qarşı çıxıb. Yerli planlaşdırma qurumu isə hələ yekun qərarını açıqlamayıb.

Lübnanlı Müsəlmanlar Dərnəyinin nümayəndələri, daxil olan rəyləri nəzərə alaraq layihəni yenidən işləməyi planladıqlarını açıqlayıblar. Dərnəyin katibi Corc Xeir "St. Mary Katedrali-nin zəngləri problem olmur, amma azan təhdid kimi görülür. Səsgücləndirici yalnız cümə namazında istifadə olunacaq, gecə klubu kimi gecə saatlarında insanları narahat etməyəcəyik" deyib.

Hoparlör quraşdırılmasına qarşı çıxanlar isə "Digər kilsələr məhəllədə bu qədər yüksək səsli yayım etmir. Niyə məscidə xüsusi icazə verilməlidir?" şəklində mövqelərini bildirib. Digər tərəfdən, bəzi şəxslər əsas məsələnin səsin məqbul səviyyədə saxlanılması olduğunu vurğulayıb.

Telegramda izləyin