Məhkəmədə ərini öldürən gənci qucaqlayıb, bağışladı - VİDEO

Amerika Birləşmiş Ştatlarının Corciya ştatında velosiped sürən Charles Johnson-a avtomobillə vurub hadisə yerindən qaçan 24 yaşlı Joseph Tillman, məhkəmənin qərarı ilə 20 il müddətinə azadlıqdan məhrum edilib.

Sonxeber.az türk mediasına istinadən xəbər verir ki, Tillman, məhkəmədə spirtli içki və narkotik təsiri altında sükan arxasına keçdiyini, qəzadan sonra hadisə yerindən uzaqlaşdığını etiraf edib. O, peşman olduğunu bildirib.

Məhkəmə zamanı gözlənilməz bir an yaşanıb – Charles Johnson-un həyat yoldaşı Regina Johnson göz yaşları içində Tillman-a sarılaraq onu bağışladığını deyib. Bu səhnə zalda olan hər kəsi dərindən təsirləndirib. Regina, bu addımını "Tanrı mənə ona sevgi göstərməyi istədi" sözləri ilə izah edib.

Hakim belə bir hadisəyə daha əvvəl şahid olmadığını bildirib. Regina əlavə edib: "Joseph-in keçmişində sağalması gərəkən yaralar var, bizim hamımız kimi. Ona şəfqət göstərmək istədim."

Tillman isə məhkəmədə belə deyib: "Səhvlərimi düzəltmək üçün uzun bir yola çıxdım, yaxşılaşmaq üçün çalışıram. Yaşatdığım acıya görə rahatlıq haqqım olmadığını bilirəm." Onun vəkili də müvəkkilinin həyatını müsbət yöndə dəyişdirdiyini vurğulayıb.

Charles Johnson, yaşadığı icmada sevilən və yardımsevər bir insan kimi tanınırdı. O, 50 illik həyat yoldaşı Regina, iki oğlu, bir qızı və beş nəvəsini geridə qoyub. Ailəsi və yaxınları onun xatirəsini yaşatmaqda davam edir.

Telegramda izləyin