Hindistanda fillə selfi çəkmək istəyən turist ağır yaralandı

Hindistanın Karnataka ştatında yerləşən vəhşi təbiəti qoruma ərazisində bir turist fil ilə selfi çəkməyə çalışarkən hücuma məruz qalıb və ağır yaralanıb.

Sonxeber.az türk mediasına istinadən xəbər verir ki, fil yol kənarında yerkökü yeyərkən R. Basavaraju adlı turist ona yaxınlaşıb və foto çəkmək istəyib. Flaş işığından qıcıqlanan nəhəng heyvan əvvəlcə xortumunu yelləyib, daha sonra isə sürətlə turistin arxasınca qaçıb. Panikaya düşən kişi yola atılaraq qaçmağa çalışsa da, yıxılıb. Fil bir neçə dəfə onun üzərinə basıb. Hücum zamanı turistin şalvarı və alt paltarı da cırılıb.

Ağır yaralanan Basavaraju xəstəxanaya aparılıb. Ona qoruma ərazisinə icazəsiz daxil olduğu üçün 25 min rupi (təxminən 200 funt sterlinq) məbləğində cərimə kəsilib. Bundan əlavə, turist davranışının yanlış olduğunu etiraf etdiyi bir video çəkməyə məcbur edilib.

Hadisəni lentə alan Daniel Osorio, bunun vəhşi təbiət qaydalarına əməl etməyin vacibliyini göstərən ciddi bir dərs olduğunu deyib: "Bu iş yalnız təlim keçmiş mütəxəssislərə həvalə edilməlidir."

Hindistan dünyadakı Asiya fillərinin 60 faizinə ev sahibliyi edir. Rəsmilər bu cür məsuliyyətsiz hərəkətlərin həm insanlar, həm də heyvanlar üçün böyük təhlükə yaratdığını vurğulayır. Ölkədə bu, son illərdə baş verən yeganə vəhşi heyvan hücumu deyil. Keçən il də bir leopard piknik edən qrupa hücum etmiş, üç nəfər yaralanmışdı.

Telegramda izləyin