"Azərbaycan və Türkmənistan artıq enerji, nəqliyyat və mədəniyyət sahəsində əməkdaşlığı genişləndirir" - ŞƏRH

Türkmən və Azərbaycan xalqları əsrlər boyu bir ailə kimi, qardaşlar kimi yaşayıb- yaradıblar.

Bu fikirləri Prezident İlham Əliyev Türkmənistan, Azərbaycan və Özbəkistan arasında yüksəksəviyyəli görüşün yekunlarına dair bəyanatında səsləndirib.

Dövlətimizin başçısı qeyd edib: "Bu gün iki müstəqil dövlət bu ənənələrə sadiqdir, bu ənənələri yaşadır və yeni üfüqlərə doğru birgə addımlayır.

"Prezident İlham Əliyevin Türkmənistanla bağlı səsləndirdiyi fikirlər sadəcə diplomatik kompliment deyil, dərin tarixi və strateji məna daşıyır" - bunu Sonxeber.az-a açıqlama verən politoloq Tural İsmayılov deyib:

"Türkmən və Azərbaycan xalqlarının "bir ailə, qardaş" kimi təqdim edilməsi, hər iki xalqın ortaq köklərə, dilə, mədəniyyətə və mentalitetə sahib olduğunu vurğulamaqdır. Bu, həm ictimai şüurda yaxınlıq hissini gücləndirir, həm də dövlətlərarası münasibətlərə emosional dayaq yaradır.

Əsrlər boyu ortaq tarix, İpək Yolu üzərindəki qarşılıqlı əlaqələr, mədəni inteqrasiya bu xalqları bir-birinə bağlayıb. Bu gün İlham Əliyevin çıxışı həmin tarixi yaddaşın müasir dövr üçün yenidən aktual edilməsi deməkdir. Çünki xalqlar arasında psixoloji və mədəni yaxınlıq siyasi və iqtisadi əməkdaşlığın möhkəm bünövrəsidir.

İlham Əliyevin "ənənələri yaşatmaq və yeni üfüqlərə doğru birgə addımlamaq" tezisi iki əsas məqamı əks etdirir: bir tərəfdən tarixə bağlılıq, digər tərəfdən isə gələcəyə yönəlmiş strateji baxış. Azərbaycan və Türkmənistan artıq enerji, nəqliyyat və mədəniyyət sahəsində əməkdaşlığı genişləndirir. Bu əməkdaşlıq gələcəkdə türk dünyasının vahid güc mərkəzinə çevrilməsinə də xidmət edir.

Əlavə olaraq, bu mesaj Türkmənistana ünvanlanmış yumşaq, amma strateji çağırışdır: neytrallıq siyasətindən çıxaraq daha fəal inteqrasiyaya qoşulmaq. Azərbaycan qardaşlıq vurğusu ilə göstərir ki, bu inteqrasiyanın lideri və təminatçısıdır.

Nəticə etibarilə, İlham Əliyevin sözləri sadəcə emosional deyim deyil, yeni geosiyasi mərhələnin ideoloji əsaslandırılmasıdır. Bu, həm xalqları yaxınlaşdırır, həm də dövlətlərarası əməkdaşlığa dərin strateji məna verir".

Telegramda izləyin