"26 avqust həm tarixi bir hadisə, həm də Azərbaycanın gücünün və strateji uzaqgörənliyinin nümayişi olaraq qalır" - POLİTOLOQ

"2022-ci il avqustun 26-sı Azərbaycan tarixində xüsusi bir əhəmiyyət daşıyır. Laçın şəhəri ilə yanaşı, Zabux və Sus kəndlərinin Azərbaycan tərəfindən nəzarətə götürülməsi, ölkəmizin ərazi bütövlüyü və suverenliyi baxımından strateji bir dönüş nöqtəsi oldu. Ordumuzun Laçına daxil olması təkcə hərbi əməliyyat deyil, eyni zamanda Azərbaycanın uzun illər davam edən səbr və planlı siyasətinin nəticəsi kimi qiymətləndirilməlidir" - bunu Sonxeber.az -a danışan politoloq Tural İsmayılov deyib:

"Prezident İlham Əliyevin 2023-cü il 31 iyul tarixli Sərəncamı ilə həmin günün "şəhər günü" kimi təsis edilməsi, həm tarixi yaddaşın qorunması, həm də gələcək nəsillərə ərazi bütövlüyü uğrunda mübarizənin önəmini çatdırmaq baxımından böyük əhəmiyyət kəsb edir. Bu sərəncam, həm də Azərbaycanın diplomatik və siyasi mesajıdır: torpaqlar işğaldan azad olunub və dövlət bununla bağlı öz mövqeyini simvolik olaraq da təsdiqləyir.

Təhlil baxımından, Laçın şəhərinin azad olunması həm regionda yeni reallıqlar yaradıb, həm də Azərbaycanın nəzarətində olan ərazilərin təhlükəsizliyini təmin edib. Bu hadisə həmçinin Ermənistan üçün də ciddi mesajdır: Azərbaycan ordusunun hazırlığı, strateji planlaşdırması və milli iradəsi nəticəsində hər hansı bir təxirə salınma və ya tərəddüdə yer qalmayıb.

Beləliklə, 26 avqust həm tarixi bir hadisə, həm də Azərbaycanın gücünün, dövlətçilik qabiliyyətinin və strateji uzaqgörənliyinin nümayişi olaraq qalır. Bu günün təsis edilməsi, milli həmrəylik və vətənpərvərlik hisslərinin gücləndirilməsində mühüm rol oynayır və gələcək nəsillər üçün örnək kimi saxlanmalıdır".

Telegramda izləyin